Presidenti i FSHF-së, Armand Duka u prit në një takim nga kryetari i Bashkisë Shkodër, Benet Beci, ku u diskutua në lidhje me bashkëpunimin për zhvillimin e futbollit dhe projekte të rëndësishme infrastrukturore.
Në takim ishin të pranishëm edhe kryetari i SHRF Shkodër, Lazër Matija, presidenti i Vllaznisë, Alban Xhaferri dhe përfaqësues të FSHF-së.
Pasi e falënderoi kryebashkiakun Beci për mikpritjen e ngrohtë, Presidenti Duka vlerësoi gatishmërinë për të bashkëpunuar dhe për të çuar përpara iniciativa të rëndësishme për të mbështetur rritjen e futbollit shkodran.
Kryebashkiaku Beci është shprehur i gatshëm që këtij projekti t’i vihet në dispozicion trualli në ish-Uzinën e Telave për këtë projekt madhor, që konsiston në ndërtimin e një kompleksi sportiv, hotelerie dhe shërbimesh ku përfshihen të paktën 5 fusha me përmasa standarde, që do të shërbejnë për stërvitjen e ekipeve të Vllaznisë dhe organizimin e kampionateve të moshave, duke ofruar një infrastrukturë moderne.
Nga ana e tij, Presidenti Duka theksoi se FSHF është e gatshme të mbështesë këtë projekt duke ofruar financimin dhe ndërtimin e fushave, duke kërkuar arritjen e një marrëveshje brenda një kohe sa më të shpejtë për nisjen e punimeve, teksa klubi i Vllaznia do të marrë përsipër infrastrukturën mbështetëse.
Për kreun e qeverisë së futbollit ky investim, përveçse do të ndihmonte jashtëzakonisht shumë futbollin shkodran, merr një rëndësi edhe më të madhe në kuadër të organizimit të finaleve të kampionatit Europian 2025 për moshën U-17 në Shqipëri.
Siç dihet stadiumi “Loro Boriçi” do të presë disa ndeshje të këtij kompeticioni të rëndësishëm dhe rrjedhimisht do të duhen edhe fusha për t’i ofruar ekipeve pjesëmarrëse infrastrukturë sa më të mira stërvitore.
Gjithashtu, u diskutua edhe për çështje të tjera ku mund të bashkëpunohet në të ardhmen.
