Seanca maratonë në Apelin e Gjykatës së Posaçme Kundër Korrupsionit dhe Krimit të Organizuar (GJKKO), e cila nisi paraditen e kësaj të marte, është mbyllur pa një vendim për lirimin e kryebashkiakut të Tiranës, Erion Veliaj. Veliaj, i cili është arrestuar dhe ndodhet në qeli për akuzat e korrupsionit dhe pastrimit të parave, ka kërkuar një masë më të butë sigurie.
Seanca, e cila zgjati për disa orë, përfshiu mbrojtjen e avokatëve të Veliajt dhe të tre biznesmenëve të tjerë të përfshirë në çështje. Avokatët e Veliajt ofruan garanci pasurore në këmbim të lirisë së tij, duke argumentuar se nuk ka rrezik për prishjen e provave.
Prokurorët e çështjes, Altin Dumani dhe Ols Dado, kundërshtuan pretendimet e avokatëve dhe kërkuan që Veliaj të mbetet në burg. Pas përfundimit të mbrojtjes dhe qëndrimeve të prokurorëve, seanca u mbyll pa një vendim përfundimtar, duke u shtyrë për një datë tjetër.
Ky zhvillim ka ngjallur interes të madh në opinionin publik dhe mediat, duke pritur me padurim vendimin përfundimtar të Gjykatës së Apelit.
Foto nga Google Images
