Presidenti i SHBA-së, Donald Trump, ka reaguar me tone të ashpra ndaj presidentit rus Vladimir Putin pas një sulmi masiv me dronë dhe raketa në Ukrainë, i cili shkaktoi të paktën 12 viktima dhe dhjetëra të plagosur. Në një postim në rrjetin e tij social Truth Social, Trump shkroi: “Vladimir, NDALO! Po vdesin 5000 ushtarë në javë. Të përmbyllim marrëveshjen e paqes TANI!”
Kjo deklaratë vjen pas një sulmi të paprecedentë nga Rusia, ku u përdorën 355 dronë dhe nëntë raketa në një natë të vetme, duke shënjestruar infrastrukturën civile në Ukrainë. Ukraina arriti të neutralizojë shumicën e këtyre kërcënimeve, por dëmet dhe humbjet në njerëz ishin të konsiderueshme.
Në një tjetër postim, Trump e quajti Putinin “krejtësisht të çmendur” dhe paralajmëroi se agresioni i tij ndaj Ukrainës do të çojë në “rënien e Rusisë”. Ai theksoi se sulmet e fundit janë të papranueshme dhe kërkoi që të ndalet menjëherë kjo luftë e pakuptimtë.
Kremlini ka minimizuar këto deklarata, duke i cilësuar si “reaksione emocionale” dhe ka theksuar se veprimet e Putinit kanë për qëllim garantimin e sigurisë kombëtare të Rusisë.
Këto zhvillime ndodhin në një kohë kur përpjekjet për një zgjidhje diplomatike të konfliktit janë intensifikuar, por ende nuk ka një marrëveshje konkrete për paqen.
Foto nga Google Images
