Në prag të Ditës Ndërkombëtare të Personave të Zhdukur, Kryeministri i Kosovës, Albin Kurti, së bashku me Presidenten Vjosa Osmani dhe Kryetarin e Kuvendit, Dimal Basha, bëri homazhe pranë monumentit kushtuar personave të zhdukur me dhunë gjatë luftës në Kosovë dhe nën okupimin e Serbisë.
Në këtë ditë përkujtimore, Kurti rikujtoi plagën e hapur të Kosovës: 1584 qytetarë ende figurojnë të zhdukur, shumica prej tyre viktima të krimeve të kryera nga forcat serbe gjatë luftës së viteve 1998–1999. Ai tha se shteti i Kosovës është i përkushtuar maksimalisht për të zbardhur fatin e çdo viktime, duke theksuar se puna përmes gërmimeve dhe hetimeve të specializuara nuk ka ndaluar asnjëherë.
“Gjatë vitit të kaluar janë realizuar kërkime në 23 lokacione, ndërsa sivjet janë zhvilluar 18 aktivitete për gjetjen e mbetjeve mortore të viktimave, të cilat u vranë nga Serbia, u zhvarrosën dhe iu rrëmbyen edhe kufomat,” deklaroi Kurti, duke nënvizuar se drejtësia për viktimat është një detyrim moral dhe shtetëror.
Megjithatë, ai shprehu zhgënjim për mungesën e progresit në kërkimet në territorin e Serbisë, sidomos në lokacionet Kozhle dhe Batajnicë, ku dyshohet se gjenden varreza masive. Sipas tij, pavarësisht marrëveshjeve të dakorduara që nga viti 2023, autoritetet serbe vazhdojnë të pengojnë procesin.
“Mohimi i drejtësisë ndaj viktimave tona të luftës së fundit, në fakt paraprihet nga mohimi i krimeve të kryera nga Serbia, që e bën Beogradi zyrtar,” u shpreh Kryeministri.
Kurti falënderoi partnerët ndërkombëtarë për mbështetjen e vazhdueshme, por kërkoi që të ushtrohet trysni më e madhe mbi Serbinë, pasi atje ndodhen të dhënat, arkivat dhe përgjegjësit për zhdukjet me dhunë.
Ky mesazh i qeverisë së Kosovës vjen në një kohë kur familjarët e personave të zhdukur vazhdojnë të jetojnë mes dhimbjes dhe shpresës për drejtësi, duke kërkuar që kjo çështje të jetë prioritet i çdo dialogu politik me Beogradin.
Foto nga Google Images
Artikulli i përgatitur nga ACTVUSA
