Sekretari amerikan i Mbrojtjes, Pete Hegseth, deklaroi sot në një konferencë për shtyp në Pentagon se operacioni ushtarak në Irani, i njohur si “Epic Fury”, përfaqëson një qasje krejtësisht të ndryshme nga konfliktet e mëparshme të Shteteve të Bashkuara në Lindjen e Mesme.
Ai theksoi se, ndryshe nga luftërat në Irak dhe Afganistan, kjo fushatë është “e fokusuar dhe vendimtare”, me objektiva të qarta dhe të pandryshuara që nga fillimi i saj. Sipas tij, strategjia aktuale nuk synon ndërtime shtetesh apo angazhime afatgjata, por rezultate konkrete ushtarake.
Hegseth konfirmoi se qëllimet kryesore të SHBA-së mbeten shkatërrimi i kapaciteteve raketore të Iranit, goditja e flotës detare dhe parandalimi i çdo mundësie që vendi të zhvillojë armë bërthamore. Ai shtoi se operacioni po zhvillohet me intensitet të lartë dhe se mijëra objektiva janë goditur deri tani.
Sekretari nënvizoi gjithashtu se nuk ka një afat të përcaktuar për përfundimin e konfliktit, duke lënë të kuptohet se vendimet finale do të varen nga zhvillimet në terren dhe nga administrata e Donald Trump.
Deklaratat e tij vijnë në një moment kur tensionet në rajon janë rritur ndjeshëm dhe operacionet ushtarake po intensifikohen, duke ngritur shqetësime për përshkallëzim të mëtejshëm të konfliktit.
Foto nga Department of War facebook page
Artikulli pregatitur nga ACTVUSA
