Departamenti i Shtetit i SHBA ka nxjerrë një udhëzim të ri për zyrtarët konsullorë, i cili synon të forcojë kontrollin ndaj aplikantëve për viza jo-emigruese. Lajmi u raportua fillimisht nga Washington Post, duke iu referuar një kabllogrami zyrtar të brendshëm të Departamentit të Shtetit.
Sipas raportimit, udhëzimi kërkon që konsullatat amerikane në mbarë botën të shtojnë dy pyetje të reja dhe të ndjeshme gjatë intervistave për vizë. Aplikantëve do t’u kërkohet të deklarojnë nëse kanë përjetuar ndonjë formë dëmtimi apo keqtrajtimi në vendin e tyre të origjinës, si dhe nëse kanë frikë të kthehen atje.
Sipas dokumentit të cituar nga media amerikane, përgjigjja e aplikantëve do të ketë ndikim të drejtpërdrejtë në procesin e miratimit të vizës. Nëse një aplikant shpreh frikë nga kthimi në vendin e tij, kjo mund të çojë në refuzimin e vizës, pasi autoritetet amerikane mund ta interpretojnë si sinjal të mundshëm për qëllim të kërkimit të azilit pas hyrjes në SHBA.
Udhëzimi, i cili është pjesë e një kabllogrami të datës 28 prill, i referohet një politike më të gjerë të Departamentit të Shtetit për të rritur verifikimin dhe për të parandaluar keqpërdorimin e vizave jo-emigruese për qëllime të kërkesës së azilit.
Zyrtarët konsullorë janë udhëzuar që përgjigjet e aplikantëve t’i dokumentojnë në dosje dhe t’i përdorin si pjesë të vlerësimit të përgjithshëm të aplikimit.
Sipas analizave të juristëve të imigracionit, kjo qasje e re mund të sjellë pasoja të rëndësishme për mënyrën se si trajtohen aplikimet për viza, sidomos për kategori si turistët, studentët dhe vizat e përkohshme pune.
Deri tani, Departamenti i Shtetit nuk ka dhënë një koment të detajuar publik mbi kabllogramin, ndërsa mbetet e paqartë se si do të zbatohet në praktikë dhe çfarë ndikimi afatgjatë do të ketë në procesin e vizave.
Në thelb, masa shihet si një tjetër hap drejt shtrëngimit të kontrollit kufitar dhe filtrimit më të rreptë të hyrjeve në Shtetet e Bashkuara, në një kohë kur politika e imigracionit mbetet një nga temat më të debatueshme në vend.
Artikulli pregatitur nga ACTVUSA
