Aleksandër Vuçiç ka njoftuar këtë të diel dorëheqjen nga posti i Presidentit të Serbisë, duke deklaruar se vendi po hyn në një “kapitull të ri”. Vendimi vjen shtatë muaj para përfundimit të mandatit të tij të dytë presidencial dhe hap rrugën për zgjedhje të reja presidenciale.
“Ka ardhur ora e vendimit”, tha Vuçiç gjatë fjalimit të tij, duke falënderuar qytetarët për mbështetjen në dy zgjedhjet presidenciale. Ai e lidhi dorëheqjen me nevojën për një fazë të re politike, ndërsa pjesën e fundit të fjalimit ia kushtoi bilancit të viteve të tij në pushtet.
Duke iu referuar gjendjes së Serbisë në vitin 2012, Vuçiç përmendi papunësinë, humbjen e vendeve të punës dhe nivelin e borxhit publik. Sipas tij, kur mori detyrën e kryeministrit, borxhi publik ishte 79 për qind e PBB-së, ndërsa sot, sipas shifrave që ai paraqiti, është rreth 43 për qind.
Dorëheqja e Vuçiç nuk nënkupton largimin e tij nga politika. Sipas raportimeve, ai pritet të përfshihet në zgjedhjet e parakohshme parlamentare të 25 Tetorit dhe synon të vazhdojë aktivitetin politik pas largimit nga presidenca.
Me largimin nga Presidenca, Serbia hap një kapitull të ri institucional, ndërsa Vuçiç, pavarësisht dorëheqjes, mbetet një figurë qendrore në zhvillimet politike që pritet të përcaktojnë drejtimin e vendit në muajt e ardhshëm.
Ja fjala e tij:
“Ka ardhur ora e vendimit. Historia na mëson se përparimi nuk arrihet kurrë rastësisht, por përmes zgjedhjeve të vështira, përgjegjësisë përpara ndërgjegjes sonë dhe vendosmërisë për të ecur përpara. Këtë e ka thënë Uinston Çërçill kur ndodhej në një situatë të ngjashme me atë ku ndodhem unë sonte. Pas vitesh në krye të shtetit, e kupton se përparimi rrallë vjen aq shpejt sa do të dëshiroje.
Sot është dita, të nderuar qytetarë, kur jap dorëheqjen dhe, për herë të fundit në detyrën e Presidentit të Republikës, do të përpiqem të mos ju lodh me shifra, ose të paktën jo as gjysmën e asaj që mundem, por të them disa fjalë për kapitullin e ri që e pret Serbinë dhe për atë që ai përfaqëson.
Duhet të kujtojmë vitin 2012. Djemtë dhe vajzat e reja, që atëherë nuk ishin në moshë madhore ose as afër saj, nuk mund ta kujtojnë, por ne që jemi më të mëdhenj mund ta kujtojmë me lehtësi. Nga një normë papunësie prej 25,9 për qind dhe papunësi mes të rinjve prej 54 për qind, pra pothuajse asnjë i ri nuk punonte, deri te kursi i dinarit, kur çdo mëngjes zgjoheshit dhe prisnit me më shumë pasiguri të mësonit sa ishte kursi i dinarit sesa si do të ishte moti. Deri te humbja e 500 mijë vendeve të punës në vetëm tre apo katër vjet të mandatit të papërgjegjshëm të dikujt.
Kur u bëra kryeministër, borxhi publik ishte në nivelin 79 për qind të prodhimit të brendshëm bruto. Sot, falë jush, të nderuar qytetarë të Serbisë, Serbia është një vend me borxh të ulët, me një nivel borxhi dy herë më të ulët se vendet më të zhvilluara të Bashkimit Evropian. Pra, jemi në nivelin 43 për qind të borxhit publik në raport me prodhimin e brendshëm bruto, ndërsa mesatarja në Bashkimin Evropian është 84-85 për qind”, tha Vuçiç.
Foto nga Google Images
Artikulli përgatitur nga ACTVUSA
