Kryeministri Edi Rama ka njoftuar një shpërblim prej 2,500 eurosh për çdo efektiv policie të angazhuar në vijën e parë të përballjes me protestuesit, si dhe rritje të konsiderueshme të pagave të policisë nga 1 Janari. Njoftimi u bë më 19 Tetor, gjatë një takimi me drejtuesit e Policisë së Shtetit dhe ministrin e Brendshëm, Ervin Demo, pas përplasjeve të dhunshme gjatë protestave.
“Ne do ta rrisim në mënyrë të konsiderueshme pagën tuaj. Me buxhetin e ri, nga 1 Janari, paga juaj do të rritet në mënyrë të konsiderueshme. Ne do të vëmë në dispozicion një shumë prej 2500 eurosh, për çdo efektiv në front. E vendosëm kështu, për të mos bërë asnjë diferencë. Jeni një, dhe një për të gjithë. Shteti do ta fitojë këtë betejë”, deklaroi Rama.
Kryeministri e justifikoi shpërblimin me përballjen, stresin dhe sakrificat e efektivëve gjatë protestave. Por vendimi vjen në një moment kur policia po përballet edhe me akuza për përdorim të tepruar të forcës ndaj protestuesve, përfshirë të rinj dhe të mitur. Sipas raportimeve të Reuters, shtatë efektivë janë pezulluar dhe po hetohen për tejkalim të kompetencave gjatë ndërhyrjeve policore.
Vendimi për shpërblimin nuk është njoftuar si pagesë për dhunën ndaj të miturve, por si mbështetje financiare për të gjithë efektivët e angazhuar në vijën e parë. Megjithatë, në kushtet e tensioneve të larta, shpërblimi dhe premtimi për rritje pagash ngrenë pikëpyetje mbi mënyrën se si qeveria po vlerëson punën e policisë, ndërsa kërkohet njëkohësisht hetim i paanshëm për çdo rast të përdorimit të paligjshëm të forcës.
Foto nga Google Images
Artikulli përgatitur nga ACTVUSA
