Ishte njëri prej tre futbollistëve, të cilët ndërtuan aksionin e golit të vetëm të ndeshjes ku Interi mundi Romën dhe tani të gjithë flasin për Asllanin.
Ditën e djeshme “Gazzetta dello Sport” në analizën kushtuar Inter-Roma ndalej gjatë në performancën e mesfushorit shqiptar.
Koha e duhur e Turam për të pritur topin në zonë nga krahu i majtë doli në plan të dytë, ashtu si edhe e majta e Dimarkos. Sipas të përditshmes sportive më të shitur në Itali paraqitja e Asllanit është “fitorja” e madhe e Simone Inzagit, i cili mund të jetë I vetmi që nuk është habitur nga ajo që ndodhi.
Sipas “Gazzetta”-s ka qenë pikërisht Simone Inzagi, ai që ka “përmirësuar” 21-vjeçarin.
Në analizën e saj e përditshmja shkruan se Asllani i para një viti nuk do të kishte ngritur kokën lart për të parë zbritjen e Dimarkos. Në këtë pikë ka ndërhyrë Inzagi, i cili gjatë të gjithë javës në stërvitje ka rekomanduar shqiptarin që të marrë vendimet më shpejt dhe të guxojë më shumë me pasimet e gjata.
