Jo vetem për personat që janë në kërkim të aventurave dhe gjetjes së bukurive të rralla natyore,por edhe për ata të cilët janë të dhënë ndaj historisë dhe fesë, Kepi i Rodonit duket se ofron diçka për të gjithë.
Ndodhur në pjesën veriore të Durrësit, vetëm rreth 70 kilometra larg Tiranës , Kepi i Rodonit është kthyer në një nga pikat më tërheqëse sidomos për personat që vizitojnë Durrësin. Ky kep futet në brendësinë e detit Adriatik dhe arsyeja pse është tepër i veçantë është pikërisht për shkak të pozitës gjeografike ku ai ndodhet si dhe pamjes në formë gadishulli .
Veçantia e tij qëndron mbi faktin se ai mban një nga trashëgimitë më të rëndësishme kulturore të vendit e cila është Kalaja e Skënderbeut, një objekt që siç na dëshmon dhe historia është ngritur në periudhën e rrethimit të parë të Krujës në vitin 1450 dhe tanimë kjo kala mund të shihet nga turistët.
Për mos lënë pas turizmin fetar , Kisha e Shën Ndout gjithashtu gjendet në Rodon. Kjo kishë , monument i trashëgimisë kulturore , përmban një arkitekturë të veçantë. Dhe nga vendasit përshkruhet si “ kisha e mrekullive” ku sipas tyre mbart një domethënie të madhe për ta dhe për njerëzit të cilët besojnë.
Krah saj ndodhen edhe tre manastire të tjera katolike.
Përpos të gjithave Kepi i Rodonit është një vend i cili ofron hiking ku shumë të rinj zgjedhin pikërisht këtë pikë për të eksploruar gjithë terrenin dhe cfarë ai ofron. Nisur nga rrënojat historike e deri tek pamja e pazëvëndësueshme dhe e veçantë e detit.
Foto nga Gazeta Shqip.
