Deputeti i Partisë Demokratike Agron Shehaj ka replikuar me kryeministrin Edi Rama në lidhje me akuzat e bëra në Kuvend. Ai i tha kreut të qeverisë se ai qëndron pas kompanive të fshehura që marrin tendera dhe vjen në Kuvend për të bërë viktimën.
“Roli i viktimës nuk ju shkon. Nëse këtu ka viktima, viktima janë ata që ikin me gomone. Këta janë viktimat e vërteta. Sa i takon fyerjeve dhe sharjeve nuk bëtë gjë tjetër përveç asaj që bëjnë të gjithë këtu. Si Gjiknuri herën tjetër që tha je budalla. Ti the je idiot. Si më kalon mua nëpër mendje që pas kompanisë offshore në Holandë mund të jeni ju dhe ministrat tuaj.
Si mund të mos më kalojë mua nëpër mendje. Ju i dhatë një 26-vjeçari, i morët aplikimin para se ai të regjistronte kompaninë. Doli e vërtetë tani. Unë edhe në rast nuk kisha provën që ju ishit pas. Kompanitë offshore prandaj duhen. Ju vini këtu duke bërë viktimën. Kompanitë e fshehura prandaj bëhen për ta fshehur. Ju e keni bërë njëherë dhe u kapët. Unë ia dhashë 20 mln euro?”, deklaroi Shehaj.
Rama ju përgjigj me një gjuhë mjaft të ashpër duke përdorur disa ofendime në drejtim të tij ndërsa tha se Kuvendi është bërë për të thirrur urgjencën.
“E kupton ça thua? Se unë nuk kam nga ta di nëse jeni ju pas kompanive offshore por meqë janë bërë për t’u fshehur jeni ju mbrapa. Ti më thua mua kriminel sepse një kryeministër i fshehur offshore është kriminel. Dhe del ai tjetri. Avokati i avoketërve që ta bën të bardhën të zezë dhe të zezën të bardhë dhe thotë dashke prova ti. Kemi ardhur në civilizim barbar. Jeni në vete ju? Ju keni ikur fare. Doni të përmbysni edhe normat më elementare të komunikimit të njeriut me njeriun.
Ti më thua mua u kape në falsifikim. Prandaj të them unë, je idiot apo bën vetë. Kompania që jo vetëm që nuk ka marrë asnjë lekë por i ka lënë të gjithë paratë që vuri garanci. Këto janë disa çudira. I dhatë këtë atij. Kështu e ke në mendje ti? Flet gjëra që mua nuk do më shkonte kurrë në mend. U bë për të thirrur urgjencën këtu. Shko dhe bëj ndonjë skaner. Ti nuk ma tregon dot. Jeni bërë fare, nuk keni as frena. Nuk e di si ia bëni natën. Flisni përçart. Për gjërat për të cilat fole, fatmirësisht ka një provë shumë të madhe”, tha Rama.
