Në një hap të rëndësishëm drejt forcimit të sigurisë rajonale, Shqipëria, Kroacia dhe Kosova nënshkruan në Tiranë “Deklaratën e Përbashkët të Bashkëpunimit në Fushën e Mbrojtjes”. Ky dokument historik u firmos nga ministri i Mbrojtjes i Shqipërisë, Pirro Vengu, ministri i Mbrojtjes i Kosovës, Ejup Maqedonci, dhe zëvendëskryeministri dhe ministri i Mbrojtjes i Kroacisë, Ivan Anušić.
Deklarata synon të forcojë aftësitë mbrojtëse të tri vendeve, të zhvillojë industrinë dhe teknologjinë e mbrojtjes, si dhe të përmirësojë ndërveprimin ushtarak në rajon. Ministri Vengu theksoi rëndësinë e këtij bashkëpunimi, duke deklaruar: “Kemi një vlerësim të përbashkët të kërcënimeve në një mjedis sigurie të brishtë. Në këtë kontekst, angazhimi ynë për zhvillimin e kapaciteteve tona mbrojtëse është më i fortë se kurrë.”
Ky zhvillim strategjik pasqyron aleancën e ngushtë mes tri shteteve, të lidhura nga historia, sakrificat për liri dhe një vizion i përbashkët për një të ardhme të sigurt. Gjithashtu, Shqipëria dhe Kroacia do të punojnë ngushtësisht për të mbështetur aspiratat e Kosovës për integrim të plotë në strukturat rajonale dhe euroatlantike.
Ministrat Anušić dhe Maqedonci e vlerësuan këtë marrëveshje si një hap të rëndësishëm për forcimin e sigurisë dhe stabilitetit në rajon, duke theksuar rëndësinë e bashkëpunimit për përballimin e sfidave të përbashkëta.
Foto nga Google Images
