Presidenti amerikan Donald Trump ka emëruar Mike Waltz si ambasadorin e ri të Shteteve të Bashkuara në Kombet e Bashkuara, pas largimit të tij nga posti i Këshilltarit të Sigurisë Kombëtare.
Në një deklaratë të bërë publike në platformën e tij sociale, Trump vlerësoi kontributin e Waltz në shërbimin ndaj vendit, duke theksuar se ai ka qenë një figurë e rëndësishme në fushën e betejës, në Kongres dhe në administratën e tij.
“Që nga koha e tij në uniformë në fushën e betejës, në Kongres dhe, si Këshilltar im i Sigurisë Kombëtare, Mike Waltz ka punuar shumë për të vënë Interesat e Kombit tonë në plan të parë. E di që ai do të bëjë të njëjtën gjë në rolin e tij të ri,” u shpreh presidenti, duke shprehur besimin e tij në aftësitë e Waltz për të përfaqësuar interesat e SHBA-së në OKB.
Ndërkohë, Trump ka njoftuar se Sekretari i Shtetit, Marco Rubio, do të marrë përkohësisht rolin e Këshilltarit të Sigurisë Kombëtare, duke e kombinuar këtë detyrë me pozicionin e tij aktual në Departamentin e Shtetit. Ky ndryshim i papritur në administratë ka ngjallur reagime të ndryshme në politikën amerikane.
Mike Waltz, në një reagim të tij, ka shprehur mirënjohjen për besimin e presidentit dhe ka theksuar se do të vazhdojë të shërbejë me përkushtim në rolin e tij të ri.
Ky zhvillim pritet të ketë ndikim në politikën e jashtme të SHBA-së, veçanërisht në marrëdhëniet me OKB-në dhe aleatët ndërkombëtarë.
Foto nga Google Images
