Londër – Këngëtarja me origjinë shqiptare, Dua Lipa, është shpallur si artistja më e dëgjuar dhe më e klikuar në Mbretërinë e Bashkuar për vitin 2024, sipas raportit vjetor të “Phonographic Performance Limited” (PPL), institucioni që monitoron transmetimet muzikore dhe shpërndarjen e te drejtave për artistët në Britani.
Sipas raportit këngët e Dua Lipës klikohen mesatarisht 400 herë në ditë dhe më e preferuara në gjithë repertorin e saj është “Houdini”.
Ky vlerësim konfirmon edhe një herë suksesin e jashtëzakonshëm të Dua Lipës në skenën muzikore ndërkombëtare, ku ajo vazhdon të kryesojë top-listat me hite të njëpasnjëshme dhe bashkëpunime me emra të mëdhenj të industrisë. Albumi i saj i fundit, i publikuar në vitin 2024, ka qenë ndër më të transmetuarit në platformat dixhitale dhe radiot britanike.
Përveç suksesit muzikor, Dua Lipa ka spikatur edhe për angazhimin e saj kulturor dhe publik, duke përfaqësuar me krenari rrënjët e saj shqiptare në çdo dalje publike, event ndërkombëtar apo intervistë.
PPL, në raportin e saj, thekson se renditja është bazuar në të dhënat e transmetimeve në radio, televizione dhe ambiente publike, duke reflektuar ndikimin real të muzikës në publikun britanik gjatë gjithë vitit 2024.
Ky nuk është vlerësimi i parë për Dua Lipën nga PPL – edhe në vitet e kaluara, ajo ka qenë pjesë e listës së artistëve më të dëgjuar, por ky vit e gjen atë në majën e suksesit, si artistja më e klikuar dhe më e pranishme në audiencën britanike.
Dua Lipa vazhdon të jetë jo vetëm një ikonë e muzikës moderne, por edhe një zë i fuqishëm për diasporën shqiptare në botë.
Foto nga Google Images
