Në një akt solemn dhe simbolik, Presidentja e Republikës së Kosovës, Vjosa Osmani, ka ndarë sot Medaljen Presidenciale të Meritës për Nënat e Srebrenicës, në prag të 30-vjetorit të gjenocidit të Srebrenicës, ngjarje që tronditi ndërgjegjen ndërkombëtare dhe la pas vetes mbi 8,000 viktima të masa.kruara nga forcat serbe të udhëhequra nga Ratko Mladiq dhe regjimi i Sllobodan Millosheviçit.
Në fjalimin e saj gjatë ceremonisë, Presidentja Osmani theksoi guximin e jashtëzakonshëm të këtyre grave, të cilat, përkundër dhimbjes së paimagjinueshme për humbjen e bijve, burrave dhe vëllezërve të tyre, nuk janë ndalur kurrë së kërkuari drejtësi.
“Guximi i tyre i palëkundur përballë dhimbjes së humbjes, vendosmëria për ta shndërruar pikëllimin në shpresë dhe kujtimin në një kërkim të pandalur për drejtësi, janë frymëzim për gjenerata të tëra,” – deklaroi Osmani me tone të përshkruara nga ndjeshmëria dhe përulësia.
Ky vlerësim vjen në një moment të rëndësishëm për historinë e Ballkanit, ku kujtesa historike, drejtësia ndërkombëtare dhe ndëshkimi i krimeve të luftës vazhdojnë të jenë plagë të hapura, veçanërisht për viktimat e gjenocidit dhe për ata që kërkojnë që e vërteta të mos harrohet.
Një nderim për kujtesën, drejtësinë dhe qëndresën
“Kujtim i përhershëm për të gjitha viktimat e regjimit gjenocidal të Millosheviqit,” – ishte mesazhi përmbyllës i Presidentes Osmani, duke përforcuar lidhjen shpirtërore dhe historike mes popullit të Kosovës dhe atij të Bosnjës, të dy të shënjestruar nga regjimi serb gjatë viteve ’90.
Nënat e Srebrenicës janë kthyer ndër vite në simbol të luftës për drejtësi, dinjitet dhe për mos-harresë. Ato kanë qenë zëri i të zhdukurve dhe përfaqësueset më të fuqishme të kërkesës për ndëshkimin e kriminelëve të luftës – një mision që vazhdon ende sot, pavarësisht rezistencës politike apo mohimëve sistematike në disa qarqe të rajonit.
Ky nderim nga Kosova është gjithashtu një sinjal i qartë për komunitetin ndërkombëtar: se gjenocidi nuk duhet të relativizohet, viktimat nuk duhet të harrohen dhe pa drejtësi nuk ka paqe të qëndrueshme në Ballkan.
Në prag të përkujtimit të 30-vjetorit të gjenocidit në Srebrenicë, veprimet e tilla simbolike janë më shumë se ceremoni – ato janë thirrje për ndërgjegjësim, përkrahje dhe mobilizim të vazhdueshëm për të siguruar që një tragjedi e tillë të mos përsëritet kurrë më.
Foto nga profili i Presidente Vjosa Osmani
