Kosova nisi me emocione dhe dinjitet festimet për 26-vjetorin e çlirimit, një ditë me rëndësi historike dhe shpirtërore për mbarë kombin shqiptar. Në zemër të Prishtinës, në sheshin “Skënderbeu”, atmosfera u mbush me solemnitet dhe krenari, ndërsa një prej zërave më të veçantë të skenës botërore, sopranoja shqiptare me famë ndërkombëtare Ermonela Jaho, hapi natën me një performancë që mbajti frymën pezull.
E shoqëruar nga Orkestra Filarmonike e Kosovës, Ermonela Jaho solli në skenë një repertor të përzgjedhur që përçoi thellë emocionin e sakrificës, kujtimit dhe triumfit. Zëri i saj i fuqishëm dhe plot ndjeshmëri u bë simbol i shpirtit të një populli që, përmes dhimbjes dhe përpjekjes, arriti të fitojë lirinë. Publiku i shumtë në shesh, por edhe ata që e ndoqën përmes transmetimeve televizive, u përfshinë nga një ndjesi e fortë uniteti dhe mirënjohjeje.
Kjo ngjarje shënon jo vetëm përkujtimin e një momenti historik, por edhe vlerësimin e lirisë dhe të rrugës së shtetformimit të Kosovës. Përfshirja e një artisteje të kalibrit të Ermonela Jahos në këtë ceremoni i dha një tjetër dimension kremtimit, duke treguar se kultura dhe arti janë pjesë thelbësore e identitetit tonë kombëtar.
Festa do të vijojë me aktivitete të ndryshme për gjatë ditës dhe javës në vijim, përfshirë ekspozita, koncerte, homazhe dhe manifestime të tjera që kujtojnë sakrificën e heronjve dhe dëshmorëve që bënë të mundur lirinë e Kosovës.
Foto nga Google Images
