Washington, 7 gusht 2025 — Departamenti Amerikan i Shtetit ka njoftuar nisjen e një projekti pilot 12-mujor, që do të kërkojë garanci financiare deri në 15 mijë dollarë për shtetasit nga dy vende të Afrikës: Malaui dhe Zambia, që aplikojnë për viza jo-emigruese për qëndrime të përkohshme në SHBA. Shqipëria nuk është pjesë e kësaj skeme, të paktën për momentin, sipas deklaratës zyrtare të publikuar nga Departamenti i Shtetit.
Ky vendim është pjesë e një përpjekjeje të re për të luftuar abuzimin me vizat dhe qëndrimet e paligjshme në territorin amerikan. Sipas autoriteteve amerikane, shumë aplikantë nga vendet që përfshihen në këtë program kanë një përqindje të lartë të moskthimit në vendlindje pas përfundimit të afatit të vizës. Pra, rreziku i qëndrimit të paligjshëm në SHBA është shumë i lartë për këta shtetas.
Megjithëse Shqipëria është shpesh në fokusin e debatit publik për emigracionin, vendi nuk është përfshirë në këtë fazë të parë të projektit, çka tregon se aktualisht niveli i shkeljes së kushteve të vizës nga shtetasit shqiptarë nuk konsiderohet problematik në shkallë alarmante, sipas kritereve që ka vendosur administrata amerikane.
Kjo nuk do të thotë se situata është ideale, por SHBA po fokusohet fillimisht në vendet ku norma e tejkalimit të vizave dhe rreziku i qëndrimit të paligjshëm është më e lartë se 10%. Malaui dhe Zambia janë zgjedhur si rast studimi për të vlerësuar efektivitetin e vendosjes së garancisë financiare si mjet për të ulur keqpërdorimet.
Çfarë nënkupton garancia financiare?
Sipas projektit, individët që aplikojnë për disa kategori vizash do të duhet të depozitojnë një garanci deri në 15,000 USD, e cila do t’u kthehet vetëm nëse respektojnë afatin e qëndrimit të përcaktuar në vizë dhe kthehen në vendin e tyre në kohë. Në të kundërt, garancia humbet dhe individi përfshihet në lista të ndalimit për viza të ardhshme.
A mund të përfshihet Shqipëria në të ardhmen?
Zyrtarët amerikanë kanë theksuar se projekti është pilot dhe do të vlerësohet pas 12 muajsh për efektivitetin dhe zbatueshmërinë. Nëse modeli rezulton i suksesshëm dhe nëse vende të tjera rezultojnë me përqindje të larta të shkeljeve të rregullave të vizave, lista mund të zgjerohen, përfshirë dhe Shqipërinë në të ardhmen.
Për momentin, shtetasit shqiptarë nuk preken nga ky vendim, por dinamika e emigracionit dhe e shkeljeve të vizave do të mbeten nën monitorim të vazhdueshëm nga autoritetet amerikane. Ky është një sinjal se politikat e vizave po ashpërsohen globalisht, dhe respektimi i rregullave të vizave bëhet gjithnjë e më i rëndësishëm për ruajtjen e aksesit të lirë në SHBA.
Foto nga Google Images
Artikulli i përgatitur nga ACTVUSA
