KRUJË – Kruja vijon të përballet me situatë shqetësuese nga zjarret, pasi gjatë ditës së sotme janë riaktivizuar dy vatra zjarri, një në zonën e Krastës dhe tjetra në lagjen Abazaj.
Në Krastë, flakët janë shfaqur sërish në pjesën veriore të zonës, duke përfshirë sipërfaqe me pyje dhe bimësi. Era e fortë po favorizon përhapjen e zjarrit dhe po e vështirëson ndërhyrjen e forcave në terren. Raportimet e fundit bëjnë me dije se ndërhyrja po kryhet si nga toka, ashtu edhe nga ajri.
Ndërkohë, një tjetër vatër është aktive në Abazaj, ku flakët po përhapen në shpatin e malit. Situata është veçanërisht shqetësuese për shkak të afërsisë me zonat ku ndodhen depo me lëndë plasëse të përdorura nga guroret. Era dhe terreni i pjerrët po favorizojnë përhapjen e flakëve.
Raportimet mediatike bëjnë të ditur se zjarri në Abazaj ka rrezikuar edhe banesa në zonë, ndërsa autoritetet janë angazhuar për vënien nën kontroll të situatës.
Për momentin, shkaqet e zjarreve nuk janë konfirmuar zyrtarisht.
Kruja është përballur edhe më herët me zjarre të përsëritura në zonën e Krastës, duke shkaktuar dëme të konsiderueshme në sipërfaqet pyjore. Rikthimi i flakëve ka shtuar shqetësimin e banorëve dhe kërkesat për ndërhyrje të shpejtë të autoriteteve.
Situata mbetet në zhvillim, ndërsa forcat zjarrfikëse dhe strukturat e emergjencave vijojnë përpjekjet për izolimin dhe shuarjen e vatrave.
Foto nga Google Images
Artikulli pregatitur nga ACTVUSA
