Kreu i Partisë Demokratike, Sali Berisha, ka reaguar fuqishëm pas njoftimeve për takimin e gjatë prej 7 orësh mes kryeministrit Edi Rama dhe zv/kryeministres Belinda Balluku. Në një postim që ai ka shpërndarë në rrjetet sociale, Berisha e përshkroi këtë takim si një “kacafytje verbale” mes “bashkëvjedhësve më të mëdhenj të kombit” dhe tha se një nga momentet më kritike ishte debati për mesazhet SMS.
Sipas Berishës, Balluku ka refuzuar që të pranojë akuzat, duke deklaruar se “tuneli i Llogarasë është urdhër i Ramës që unë e zbatova”. Ai citon një dialog të tensionuar ku Rama thuhet se ka pranuar se prokuroria e ka informuar që mesazhet e Ballukut me Ervis Berberin janë “përvëluese” dhe “haptas”, dhe nuk mund të injoroheshin. Ndërsa Balluku, sipas Berishës, ka kundërshtuar fort: “Po të ishin mesazhet e mia problemi, në vend timin do të ishe ti!”
Një tjetër akuzë që Berisha ngre është se Rama, pas largimit për darkë, ka kërkuar një takim tjetër me Ballukun – një veprim që sipas tij tregon përpjekje për kontroll të mëtejshëm. Ai gjithashtu pretendon se në takim ka qenë i pranishëm Don Agaçio, me të cilin Balluku ka pasur takime ditore në vilën e tij, një fakt që Berisha e sheh si indicie për ndikim të jashtëm dhe marrëveshje të fshehta.
Berisha lidh mesazhet me hetimet për korrespondencë mes Ballukut dhe Berberit, duke akuzuar Rama-n se “ka diktuar çdo frazë” në ato SMS. Ai e përshkruan këtë si “moment kyç për të ekspozuar ndërhyrjen e qeverisë në drejtësi” dhe paralajmëron intensifikimin e veprimeve politike të opozitës për këtë çështje.
Ja postimi i plote i Sali Berishes:
“SMS-të janë gracka!
Një shtesë e detyruar, për kacafytjen verbale 7-orëshe Rama–Balluku.
Të dashur miq, para pak orësh publikova disa nga njoftimet e veshit të mureve të kacafytjes verbale të egër midis Lubi Ballukut dhe Edi Ramës, hajdutëve më të mëdhenj në historinë e kombit, në takimin më të gjatë të jetës së tyre midis mijëra syresh që kanë pasur në 25 vite miqësi dhe bashkëpunim në vjedhje.
Një ndër momentet më kulmore, por edhe më pikante, ka qenë debati për SMS-të.
Kundrejt aludimit të Belindës se në përsekutimin e saj Rama u tregua indiferent ndaj vendosjes së saj nën akuzë dhe tani, sipas saj, pas shkeljeve të rënda të kushtetutës me pezullimin nga detyra, sikur të ishte magazinierja e qeverisë, ai i kërkon asaj dorëheqjen.
Në fakt, ti kërkon të lash duart me mua, ndërkohë që tuneli i Llogarasë është fillim dhe mbarim urdhër i yt i zbatuar nga unë. Rama, i hutuar, i thotë se ai kishte bindje se Lubia është e pafajshme, por prokurori i kishte thënë se SMS-të e tua me Ervis Berberin ishin përvëluese, haptas fare madje, dhe nuk mund të injoroheshin.
“Gënjeshtra, gënjeshtra!” – ia ktheu me tërbim Lubia. “Kujt i flet ti për SMS? Po të ishte për SMS, në vend timin duhet të ishe ti! Po, ti e di që në dosje janë me dhjetëra e dhjetëra SMS 69 siç më tregoi Pamela se ajo i kishte numëruar, që ti i ke dërguar Ervis Berberit për tunelin dhe që faktojnë se Ervisi dhe unë jemi koka turku sepse vetëm kemi zbatuar urdhrat tuaj, kurse tani më thua se fakti penal qenkan SMS-të e mia me Visin.
Pa më thuaj pak, pse SMS-të e mia me Ervisin qenkan provë krimi për ty dhe Preçin, kurse SMS-të tuaj, në të cilat ju urdhëroni për të gjitha veprimet Ervisin, nuk janë provë krimi? Kjo nuk kalohet! SMS-të janë në dosje dhe jo vetëm në dosje. Koka turku se kam zbatuar urdhrat tuaj nuk bëhem unë. Të them se do vish edhe ti me mua!”
Pas largimit të Ramës për darkë, ai i kërkon Lubisë një takim tjetër pas darke; veshi i mureve nuk ka njoftuar informacione për takimin e pasdarkës.
P.S. Në takim, përveç Uluziut që u thirr dëshmitar në sherrnajën shumorëshe të fazës finale të divorcit politik më të dhimbshëm në historinë e vendit të bashkëvjedhësve më të mëdhenj në historinë e kombit, në takim është thirrur dhe ka hyrë e dalë edhe Don Agaçio, me të cilin Lubia javën e fundit ka pasur takime të përditshme (paradite), jo në Kryeministri, por në vilën e tij.”
Foto nga faqja e Sali Berishes
Artikulli i përgatitur nga ACTVUSA
