Kryetari i Partisë Demokratike, Sali Berisha, ka komentuar sot përplasjet mes kompanive aksionare të përfshira në ndërtimin e aeroportit të Vlorës, duke paralajmëruar se çështja mund të përfundojë në arbitrazh ndërkombëtar me pasoja të rënda financiare për Shqipërinë.
Në një deklaratë për mediat jashtë Kuvendit, Berisha tha se nuk mban anën e asnjë prej palëve në konflikt, duke theksuar se vlerësimi i mosmarrëveshjeve duhet t’u takojë institucioneve përkatëse dhe gjykatave.
Sipas tij, mënyra se si po ndërhyn shteti në këtë proces mund të sjellë pasoja të kushtueshme për buxhetin e vendit. Berisha deklaroi se, bazuar në informacionet që disponon, Shqipëria rrezikon një penalitet që mund të arrijë të paktën në 500 milionë euro.
Ai u ndal edhe te kontrata e aeroportit, duke pretenduar se qeveria shqiptare ka marrë përsipër pagesa shumëvjeçare që lidhen me mungesën e biletave apo trafikut ajror, një marrëveshje që sipas tij është e pazakontë.
Berisha argumentoi se konflikti duhej të zgjidhej mes ortakëve përmes rrugëve ligjore dhe arbitrazhit mes palëve private, pa përfshirjen e shtetit. Ai kritikoi ndërhyrjen e institucioneve shtetërore, duke e cilësuar atë si një veprim që favorizon njërën palë dhe rrit rrezikun e kostove për Shqipërinë.
Debatet për projektin e aeroportit të Vlorës kanë sjellë reagime të shumta politike në javët e fundit, ndërsa deri tani nuk ka një reagim zyrtar nga qeveria lidhur me akuzat e ngritura nga opozita.
“Por vetëm një gjë ju garantoj, se mënyra se si po vepron Edi Rama, shkon sipas atyre të dhënave që kam, në një gjobë jo më pak se gjysmë miliardi euro kundër Shqipërisë. Në aeroportin e Vlorës mund të ketë kundërshti midis ortakëve. Çështja është tek një 130 milionë euro të kontratës. Sipas kontratës të pashembullt, të pashembullt, qeveria shqiptare i paguan kompanisë çdo vit, për 13 vite, 10 milionë euro bileta të munguara. Në qoftë se do ishte e drejtë nuk çonte polici, por palët e ortakët e zgjidhnin në të gjitha shkallët e gjyqësorit. Paditësi nuk duhet të padiste Shqipërinë, duhet të padiste ortakun. Edhe të shkonin në arbitrazh ta zgjidhnin me ortakun. Po çfarë pune ka shteti? Që të marrë tani t’i japë lehtësimin më të madh atij”, tha Berisha.
Foto nga Google Images
Artikulli pregatitur nga ACTVUSA
