Këshilli i Ministrave ka miratuar më 19 Tetor 2026 një vendim për shpërblimin financiar të 2 750 punonjësve të Policisë së Shtetit, duke shtuar 740 milionë e 80 mijë lekë në buxhetin e Ministrisë së Punëve të Brendshme. Vendimi, i firmosur nga kryeministri Edi Rama, hyn në fuqi menjëherë dhe parashikon që fondi të mbulohet nga fondi rezervë i buxhetit të shtetit për vitin 2026.
Dokumenti zyrtar e justifikon këtë shpërblim me angazhimin e shtuar të punonjësve të policisë për garantimin e rendit dhe sigurisë publike. Drejtoria e Përgjithshme e Policisë së Shtetit do të përcaktojë listën e përfituesve dhe do të kryejë procedurat për shpërndarjen e parave.
Vendimi vjen në një moment të tensionuar politik dhe shoqëror në Shqipëri, kur studentë dhe të rinj kanë dalë në protesta kundër qeverisë, duke ngritur shqetësime për korrupsionin, padrejtësitë dhe mënyrën se si pushteti po i përgjigjet pakënaqësisë qytetare.
Kjo përputhje në kohë e bën të pashmangshëm debatin publik për mënyrën se si qeveria zgjedh të përdorë fondet e shtetit dhe për mesazhin që përcjell ky vendim në një periudhë përplasjesh mes policisë dhe protestuesve.
Ajo që dokumenti përcakton qartë është se qeveria ka miratuar një fond shtesë prej mbi 740 milionë lekësh nga rezerva e buxhetit të shtetit për shpërblimin e punonjësve të policisë.
Në një kohë kur të rinjtë kërkojnë përgjegjësi, transparencë dhe zgjidhje për problemet e vendit, publiku ka të drejtë të dijë jo vetëm se kush përfiton nga paratë publike, por edhe mbi çfarë kriteresh shpërndahen ato dhe si kontrollohet përdorimi i tyre.
Vendimi është i menjëhershëm. Tani mbetet të shihet se si do të zbatohet dhe çfarë shpjegimi do të japë qeveria për shumën individuale të shpërblimit.
Vendim i miratuar në mbledhjen e Këshillit të Ministrave, datë 19 Tetor 2026:
V E N D I M PËR DHËNIE SHPËRBLIMI PUNONJËSVE TË POLICISË SË SHTETIT DHE PËR NJË SHTESË NË BUXHETIN E MINISTRISË SË PUNËVE TË BRENDSHME, MIRATUAR PËR VITIN 2026
Në mbështetje të nenit 100 të Kushtetutës, të neneve 5 e 45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, të nenit 14, të ligjit nr.87/2025, “Për buxhetin e vitit 2026”, të ndryshuar, dhe të ligjit nr.82/2024, “Për Policinë e Shtetit”, të ndryshuar, me propozimin e ministrit të Punëve të Brendshme, Këshilli i Ministrave
V E N D O S I:
1. Dhënie shpërblimi financiar në masën prej 269 120 (dyqind e gjashtëdhjetë e nëntë mijë e njëqind e njëzet) lekësh për 2 750 (dy mijë e shtatëqind e pesëdhjetë) punonjës të Policisë së Shtetit për angazhimin e shtuar në garantimin e rendit dhe të sigurisë publike.
2. Në buxhetin e Ministrisë së Punëve të Brendshme, në zërin “Shpenzime korrente” të programit buxhetor “Policia e Shtetit”, shtohet fondi prej 740 080 000 (shtatëqind e dyzet milionë e tetëdhjetë mijë) lekësh.
3. Efekti financiar, në shumën prej 740 080 000 (shtatëqind e dyzet milionë e tetëdhjetë mijë) lekësh, që rrjedh nga zbatimi i këtij vendimi, përballohet nga fondi rezervë i buxhetit të shtetit, miratuar për vitin 2026.
4. Drejtoria e Përgjithshme e Policisë së Shtetit përcakton listën emërore të punonjësve të policisë përfitues bazuar në dokumentacionin justifikues dhe kryen procedurat për dhënien e shpërblimit.
5. Ngarkohen Ministria e Financave, Ministria e Punëve të Brendshme dhe Drejtoria e Përgjithshme e Policisë së Shtetit për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Foto nga Google Images
Artikulli përgatitur nga ACTVUSA
