Ina Zhupa e lidh reagimin e saj me denoncimet e mëparshme të Arben Ahmetajt, duke pretenduar se deklarata të tij për çështje të tjera, si kantina e verës dhe Tuneli i Llogarasë, kanë rezultuar të sakta. Sipas saj, kjo e bën të nevojshëm një hetim edhe për pretendimet e reja mbi gazin e Delvinës.
Në qendër të reagimit është Delvina, një zonë që Zhupa e përshkruan si të pasur në burime natyrore, por të varfër për shkak të mungesës së zhvillimit. Ajo akuzon qeverinë se pasuritë e vendit nuk po trajtohen si mundësi për qytetarët, por si burime për përfitime të lidhura me pushtetin.
Një pjesë e rëndësishme e reagimit i kushtohet Ron Yefet, të cilin Zhupa e përmend në lidhje me përgjimet e referuara nga Ahmetaj. Ajo kërkon që SPAK të sqarojë rolin e tij dhe nëse ka pasur ndonjë funksion në çështjen e gazit të Delvinës.
Zhupa ngre gjithashtu pyetje mbi mënyrën se si janë trajtuar pasuritë publike dhe mbi përgjegjësinë e institucioneve shtetërore. Ajo e paraqet këtë si një çështje që kërkon transparencë dhe verifikim të plotë, jo thjesht debat politik.
Në përfundim të reagimit, Zhupa thekson se gazi i Delvinës është pasuri e shqiptarëve dhe se çdo dyshim për një skemë grabitjeje duhet të hetohet deri në fund.
Reagimi i saj e vendos çështjen e gazit të Delvinës në qendër të debatit për pasuritë natyrore, transparencën dhe përgjegjësinë e institucioneve.
Reagimi i plotë i Ina Zhupës:
”Arben Ahmetaj ka bërë deklarata dhe denoncime të mëparshme nga koordinatori i krimit, kantina e verës, Tuneli i Llogarasë e me radhë që kanë dalë plotësisht të sakta. Prandaj, kur sot ai flet për gazin e Delvinës dhe një skemë të mundshme grabitjeje, kjo kërkon hetim, ashtu si çdo skemë tjeter që denoncoi.
Si drejtuese politike dhe deputete që përfaqëson Delvinën, një zonë e pasur në burime natyrore po e varfër sepse nuk është menduar si ta zhvillojmë po si ta vjedhin, i kërkoi SPAK të nis menjëherë hetimet.
Një personazh si Ron Yefet fliste në përgjime sikur diskutonte për mallin e vet, ku administrator ishte Edi Rama. Ndërkohë që në letrat e shtetit shqiptar nuk ka asnjë post zyrtar. Le të na sqaroi SPAK rolin e tij, a është koordinatori i radhës i krimit? Sekseri i radhës i familjes? Apo një tjetër hallkë e mekanizmit që e ka kthyer shtetin në pronë private?
Ahmetaj zbuloi edhe njëhere modelin Rama, modelin e një organizate kriminale. Një shtet privat ku ministrat bëhen lolo, ligjet zbatohen sipas interesit dhe pasuritë e shqiptarëve trajtohen si mall për miqtë dhe klientët e pushtetit.
Tokat, bregdeti, zonat e mbrojtura, armët dhe tani gazi i Delvinës, gjithçka duket se kthehet në një mundësi për dikë që ka lidhjen e duhur me pushtetin.
Rama e trajton Shqipërinë si plaçkën e vet, që ndahet me sekserët e radhës, ndërsa një grup pasurohet dhe shqiptarët varfërohen, qytetet boshatisen dhe pasuritë kombëtare humbasin.
Gazi i Delvinës nuk është pronë e askujt në pushtet. Është pasuri e shqiptarëve. Dhe çdo dyshim për një skemë grabitjeje duhet të hetohet deri në fund.“
Foto nga Google Images
Artikulli i përgatitur nga ACTVUSA
