Email-et e palexuara, takimet e përhershme të punës, ajo listë bezdisëse e detyrave që nuk do të bëhen kurrë vetë…!
Njerëzit shpesh ankohen se janë shumë të zënë, por asnjëherë nuk duan ta ndryshojnë këtë stil jetese.
Dorie Clark, një eksperte lidershipi dhe ish-zëdhënëse e fushatës presidenciale, thotë se shumë njerëz thjesht po e shohin punën në mënyrën e gabuar.
Clark identifikoi tre arsye kryesore pse njerëzit zgjedhin të ndihen të zënë dhe shqyrtimi i tyre është një hap i parë i dobishëm drejt rikthimit të kohës tuaj.
Arritja e një simboli statusi
Ndjenja e të qenit “i zënë” na bën të ndihemi të rëndësishëm. Clark vuri në dukje një studim të Shkollës së Biznesit të Kolumbias që sqaron pse ky fenomen vazhdon.
Studimi zbuloi se amerikanët gjithnjë e më shumë i shohin ata që janë të mbingarkuar dhe vazhdimisht të zënë si posedues të statusit më të lartë shoqëror.
Çmësimi i diçkaje aq të rrënjosur në shoqëri si një obsesion me punën nuk do të ndodhë brenda natës. Por Clark dëshiron që njerëzit të paktën të fillojnë të identifikojnë dëmet e kësaj praktike subkoshience.
Shmangia e pasigurisë
Pasiguria, veçanërisht në punë, mund të jetë e keqe për shëndetin tuaj. Anketa e Shoqatës Amerikane të Psikologjisë për Stresin në Amerikë për vitin 2022 zbuloi se 81% e amerikanëve raportuan pasigurinë globale, si shkakun kryesor të stresit.
Por pasiguria është futur në vetë jetën tonë dhe përpjekja për ta hequr atë duke e mbajtur veten qëllimisht të zënë, përfundon duke komplikuar me keq pikërisht atë që po përpiqeni të shmangni.
Mpirje
Ndonjëherë, njerëzit përpiqen të mbytin problemet e tyre me punën.
Clark përmendi humbjen e maces së saj Gideon në 2013 si një ilustrim kryesor: të kuptuarit se Gideon nuk do ta priste më në shtëpi e bëri më të lehtë për të që ta kthente punën në prioritet të jetës së saj.
“Për shumë prej nesh, ka gjëra me të cilat ndonjëherë nuk duam t’i përballojmë. Ajo që ne vërtet kërkojmë përmes punës është një anestezi. Është një impuls i zakonshëm, por jo një “zgjidhje e qëndrueshme””, tha Clark.
Thyerja e ciklit të punës
Nëse keni evidentuar ndonjë nga këto tre shkaqe rrënjësore në veten tuaj, ju jeni me fat: “Mund të përfitoni thjesht duke i vërejtur ato”, tha Clark.
Duhet të jemi vërtet të sinqertë për atë që na motivon në mënyrë që të mund të bëjmë një zgjedhje të ndryshme. Sepse bëhet fjalë për zgjedhjen tonë. Ne duhet të pranojmë se liria e vërtetë ka të bëjë me krijimin e hapësirës në mënyrë që të mund të marrim frymë dhe të mendojmë./tiranapost
