“We Love Science” është ekspozita e prezantuar në Galerinë e Bregdetit në Radhimë. Një ekspozitë e dyfishtë për publikun, me histori dhe ngjarje të gjetura në dialogun midis artit dhe shkencës. Tetë artistët bashkëkohorë italianë shkëmbejnë pikëpamjet e tyre me hulumtues dhe shkencëtarë nga tetë institucione kryesore italiane të kërkimit.
“Vepra ime lindi mbas një ballafaqimi me Institutin e Inxhinierisë Navale ku studiohen dinamikat e lëngjeve, pra trupat e zhytur në lëngje. Unë kam zhytur një dispozitiv , brenda lëngut në të cilin kishte elementë organik dhe vendosa ta fiksoj në tre momente, kur origjinali është komplet i virgjër , momenti ndërmjetës kur myku nis të godas letrën fotografi dhe momenti final kur imazhi shkatërrohet nga myku dhe ajo që ndodh me lëngun,” – u shpreh artisti Giulio Bensasson.
Kuratori i ekspozitës tha se projekti nisi me Ministrinë e Jashtme për të krijuar një dialog mes artistëve dhe shkencëtarëve dhe u seleksionuan 8 qendra kërkimi shkencor në Itali dhe në ishujt Kanarie.
“Një nga tematikat e rëndësishme që ju intereson artistëve është pikërisht ky raport me botën shkencore që po zhvillohet shumë shpejt dhe çdo artist ka parë këtë vend dhe shkencën në mënyrë të ndryshme. “We Love Science” tregon Italinë e shkencës dhe artit të ri. Më vjen mirë se për herë të parë Italia nuk prezantohet si një vend i të shkuarës, por si një vend i të tashmes dhe të ardhmes,” – shpjegoi Ludovico Pratesi.
Pjesa e dytë e kësaj ekspozite, përdor teknikën e gurit, letrës dhe robotikës dhe shpalos historinë e biologes shqiptare Sabiha Kasimati, një grua që kthehet në peshk, sjellë me mjeshtri nga artisti Driant Zeneli.
“Kam gjetur gjithmonë një paralelizëm interesant me figurën e Prometeut që sakrifikon jetën e tij për t’i dhuruar dritën njerëzimit me Sabiha Kasimatin që sakrifikon gjithë jetën e saj për t’i dhuruar elektricitetin, dritën peshqve që jetojnë në ujërat e turbullta duke ja marrë digës. Ky është një lloj paralelizmi që bëhet mes historisë së saj si shkencëtare dhe në të njëjtën kohë edhe si një person që sakrifikoi gjithçka për të thyer limitet e shkencës dhe mundësive që ajo kishte,” – tregoi Zeneli.
Veprat e ekspozuara janë krijuar nga artistë nën 36 vjeç duke përdorur teknika të ndryshme për të dhënë një vështrim në proceset dhe punën analitike që zhvillohet në disa qendra kërkimore në Itali, duke transkriptuar shpesh të dhëna në kompozime.
