Sot, më 3 prill 2025, bota e artit shqiptar feston 78-vjetorin e lindjes së një prej figurave më të spikatura të skenës dhe ekranit, Drita Haxhiraj. Me një karrierë të pasur dhe një kontribut të jashtëzakonshëm në teatrin dhe kinematografinë shqiptare, Haxhiraj mbetet një emër i dashur për publikun dhe një simbol i artit të vërtetë.
E lindur më 3 prill 1947 në Tiranë, Drita Haxhiraj spikati që në moshë të re për talentin e saj në aktrim. Pas diplomimit në Institutin e Lartë të Arteve, ajo u bë pjesë e Teatrit Kombëtar, ku interpretoi në mbi 70 role teatrale, duke sjellë në skenë personazhe të fuqishme dhe të paharrueshme.
Në kinematografi, ajo ka luajtur në filma të njohur si Zambakët e Bardhë (1983), Fejesa e Blertës (1984) dhe Vitet e Pritjes (1990). Përveç suksesit në Shqipëri, Drita Haxhiraj ka pasur edhe një karrierë ndërkombëtare, duke interpretuar në disa projekte filmike italiane.
Me një elegancë natyrale dhe një prani skenike të fuqishme, Haxhiraj ka lënë gjurmë të thella në artin shqiptar. Ajo ka qenë pjesë e pesë festivaleve në RTSH si spikere dhe ka drejtuar mbi 100 koncerte, duke dëshmuar një aftësi të jashtëzakonshme në komunikim dhe interpretim.
Në këtë ditë të veçantë, artistët dhe admiruesit e saj e urojnë për këtë përvjetor, duke vlerësuar kontributin e saj të madh në kulturën shqiptare. Gëzuar 78-vjetorin, Drita Haxhiraj! Qoftë kjo një ditë e mbushur me dashuri dhe mirënjohje për gjithë punën e saj të palodhur në artin shqiptar.
Foto nga Google Images
