Administrata e presidentit Donald Trump po ndërmerr një tjetër hap të rëndësishëm në forcimin e sigurisë ndërkombëtare, duke kërkuar bashkëpunimin e aleatëve për të adresuar atë që e konsideron si një kërcënim në rritje: ekstremizmin e majtë me lidhje ndërkombëtare.
Në mesin e muajit qershor, Departamenti Amerikan i Shtetit u dërgoi një kabllogram diplomatik më shumë se 20 ambasadave amerikane në vende të ndryshme të botës, nga Argjentina dhe Meksika deri në Itali dhe Shqipëri. Në dokument kërkohej mbledhja e informacionit mbi grupet e ekstremit të majtë dhe aktivitetin e tyre.
Sipas raportimeve të The Washington Post, Sekretari amerikan i Shtetit, Marco Rubio, ka ftuar ministra dhe zyrtarë të lartë nga më shumë se 60 vende në një konferencë që do të zhvillohet javën e ardhshme në Uashington. Qëllimi i takimit është forcimi i bashkëpunimit ndërkombëtar në identifikimin dhe luftimin e grupeve që përdorin dhunën dhe organizohen përtej kufijve shtetërorë.
Përpara konferencës, Departamenti i Shtetit ka dërguar udhëzime në më shumë se 20 ambasada amerikane, përfshirë edhe Ambasadën e SHBA-së në Tiranë, duke kërkuar koordinim me qeveritë partnere për këtë iniciativë.
Administrata Trump argumenton se ekstremizmi nuk duhet të tolerohet, pavarësisht ideologjisë që e motivon. Sipas saj, nëse komuniteti ndërkombëtar bashkëpunon kundër terrorizmit islamik dhe formave të tjera të ekstremizmit të dhunshëm, i njëjti seriozitet duhet të zbatohet edhe ndaj grupeve të ekstremit të majtë që përdorin dhunën për të arritur objektivat e tyre politike.
Megjithëse disa aleatë evropianë kanë shprehur rezerva, duke mos e konsideruar këtë fenomen si prioritet të lartë, mbështetësit e nismës argumentojnë se kërcënimet duhet të adresohen përpara se të përshkallëzohen. Ata theksojnë se historia ka treguar se injorimi i formave të reja të ekstremizmit mund të ketë pasoja serioze për sigurinë publike.
Konferenca në Uashington pritet të shërbejë si një hap i rëndësishëm drejt ndërtimit të një strategjie më të koordinuar mes vendeve partnere. Për administratën Trump, siguria kombëtare dhe lufta kundër çdo forme të terrorizmit mbeten ndër prioritetet kryesore të politikës së jashtme amerikane.
Foto nga Google Images
Artikulli pregatitur nga ACTVUSA
