Presidenti i Shteteve të Bashkuara, Donald Trump, ka firmosur këtë të enjte dy urdhra ekzekutivë që synojnë të kufizojnë të ashtuquajturin “birth tourism” (turizmi i lindjes), praktikë në të cilën shtetas të huaj udhëtojnë në SHBA me qëllim që fëmija i tyre të lindë në territorin amerikan dhe të përfitojë shtetësinë amerikane.
Sipas administratës Trump, masat e reja synojnë të godasin industrinë që organizon udhëtime të tilla dhe të kufizojnë dhënien automatike të shtetësisë për raste që lidhen me “birth tourism”. Një nga urdhrat udhëzon Departamentin e Shtetit dhe Departamentin e Sigurisë Kombëtare të hartojnë rregulla të reja për të identifikuar dhe parandaluar këtë praktikë.
Megjithatë, ekspertët ligjorë parashikojnë se urdhrat do të përballen me sfida në gjykata. Amendamenti i 14-të i Kushtetutës së SHBA-së garanton shtetësinë për pothuajse të gjithë personat e lindur në territorin amerikan, dhe çdo përpjekje për ta kufizuar këtë të drejtë ka qenë objekt i proceseve të gjata gjyqësore. Vetëm muajin e kaluar, Gjykata Supreme la në fuqi interpretimin e gjerë të së drejtës së shtetësisë me lindje, ndërsa administrata Trump ka kërkuar rrugë të tjera ligjore për të kufizuar fenomenin e “birth tourism”.
Administrata argumenton se urdhrat nuk synojnë të ndryshojnë Kushtetutën, por të luftojnë rastet ku hyrja në SHBA bëhet me mashtrim ose me qëllimin e vetëm për të siguruar shtetësinë amerikane për fëmijën. Kritikët, nga ana tjetër, paralajmërojnë se masat mund të hapin një debat të ri kushtetues dhe të prekin të drejtat e garantuara nga Amendamenti i 14-të.
Ky është hapi më i fundit i Presidentit Trump në përpjekjet për të forcuar politikat e emigracionit, një nga prioritetet kryesore të mandatit të tij të dytë në Shtëpinë e Bardhë.
Foto nga The White House
Artikulli pregatitur nga ACTVUSA
