Kryeministri Edi Rama prezantoi gjatë mbledhjes së zgjeruar të Grupit Parlamentar të Partisë Socialiste platformën e re politike “BESA”, të cilën e cilësoi si boshtin që do të udhëheqë qeverisjen në mandatin e katërt.
Sipas Ramës, platforma synon një marrëdhënie të re mes shtetit dhe qytetarëve, duke vendosur në qendër përgjegjshmërinë institucionale, llogaridhënien, cilësinë e shërbimeve publike dhe komunikimin më të drejtpërdrejtë me qytetarët. Emri “BESA” u prezantua si një simbol i angazhimit të administratës për të mbajtur premtimet dhe për të forcuar besimin e publikut tek institucionet.
Pas prezantimit të platformës, reagoi deputetja socialiste Belinda Balluku, e cila deklaroi se Shqipëria ka hyrë në një fazë të re zhvillimi.
“Tashmë vendi ka tejkaluar fazën e nevojave imediate, fazën e investimeve dhe shërbimeve për të përmbushur kushtet bazë. Sot qytetarët shqiptarë kanë pritshmëri legjitime nga shteti, pritshmëri që përputhen plotësisht me zhvillimin e shpejtë të vendit, ekonominë e qëndrueshme dhe, mbi të gjitha, me hapat e sigurt drejt Europës”, shkroi Balluku.
Megjithatë, deklarata e saj ka ngjallur reagime, pasi vjen vetëm pak muaj pasi Balluku u largua nga posti i zëvendëskryeministres dhe ministres së Infrastrukturës. Vendimi erdhi pasi SPAK nisi procedurat penale ndaj saj dhe Gjykata Kushtetuese la në fuqi pezullimin nga funksioni, ndërsa më pas kryeministri Rama riformatoi kabinetin qeveritar duke e zëvendësuar atë në detyrë.
SPAK e ka akuzuar Ballukun për vepra penale që lidhen me procedurat e prokurimeve publike në disa projekte infrastrukturore. Ajo i ka mohuar akuzat dhe procesi gjyqësor ndaj saj vijon, pa një vendim përfundimtar të formës së prerë.
Në këtë kontekst, deklaratat e Ballukut për vizionin e mandatit të katërt të qeverisë janë komentuar edhe në dritën e situatës së saj ligjore, ndërsa platforma “BESA” pritet të jetë një nga shtyllat kryesore politike me të cilat mazhoranca synon të prezantojë drejtimin e saj në vitet e ardhshme.
Foto nga Google Images
Artikulli pregatitur nga ACTVUSA
