Partia Demokratike ka zhvilluar mbledhjen e Këshillit Kombëtar, ku përveç diskutimeve mbi organizimin e brendshëm të partisë, është hedhur edhe një hap i ri në procesin e zgjedhjes së strukturave drejtuese.
Gjatë fjalës së tij, kryetari i Partisë Demokratike, Sali Berisha, bëri të ditur se ka propozuar që drejtimi i Këshillit Kombëtar t’i besohet për herë të parë një gruaje. Sipas tij, në garë për këtë post do të jenë dy kandidatura.
“Kam menduar që Këshilli Kombëtar të drejtohet nga një zonjë. Propozoj Julia Emili dhe Silva Hasa”, deklaroi Berisha para anëtarëve të Këshillit Kombëtar.
Ndërkohë, është bërë publike edhe fleta e votimit për zgjedhjen e anëtarëve të Kryesisë së Partisë Demokratike. Procesi i votimit është organizuar sipas kuotave të përcaktuara, duke ndarë kandidatët në tre kategori: femra, të rinj dhe meshkuj.
Në listën e kandidateve femra janë përfshirë 15 emra, mes të cilëve Adriana Tolka, Alketa Mukavelati, Edith Harxhi, Floriana Garo, Ilirjana Kuçana, Mirela Tabaku dhe kandidate të tjera që vijnë nga strukturat e Partisë Demokratike.
Në kategorinë e të rinjve garojnë 25 kandidatë. Mes tyre janë Andia Ulliri, Arlind Ahmetaj, Arnold Kariqi, Desada Xhetani, Eva Metaj, Julian Beqiri, Mario Runa, Tedi Topliku dhe emra të tjerë që synojnë të përfaqësojnë brezin e ri në organet drejtuese të partisë.
Ndërsa në kategorinë e meshkujve janë 21 kandidatë, ku spikasin emra të njohur të Partisë Demokratike si Alfred Lela, Arjan Ndoja, Asllan Dogjani, Dorian Teliti, Edi Paloka, Ervin Minarolli, Gazmir Spahija, Gent Strazimiri, Ilir Alimehmeti dhe Luan Baçi.
Procesi i zgjedhjes së Kryesisë së re dhe drejtuesit të Këshillit Kombëtar konsiderohet një nga momentet më të rëndësishme të riorganizimit të Partisë Demokratike, pasi do të përcaktojë përbërjen e strukturave drejtuese që do të udhëheqin partinë në periudhën e ardhshme.
Foto nga Google Images
Artikulli pregatitur nga ACTVUSA
