Situata para Kuvendit të Shqipërisë u tensionua gjatë protestës së zhvilluar këtë të martë, ku pati përplasje verbale dhe fizike mes protestuesve dhe forcave të Policisë së Shtetit.
Ndërhyrja e forcave të rendit u shoqërua me momente tensioni, ku efektivët shoqëruan disa protestues drejt automjeteve të policisë. Në pamjet e shpërndara nga vendngjarja dëgjohen thirrje nga protestuesit që kërkojnë lirimin e personave të shoqëruar, ndërsa për disa minuta situata mbeti e tensionuar.
Dëshmitarë të pranishëm raportuan se pati shtyrje dhe rezistencë gjatë ndërhyrjes së policisë, ndërsa protestuesit kundërshtuan shoqërimet, duke argumentuar se po ushtronin të drejtën e tyre për të protestuar.
Mes personave të shoqëruar nga policia ishte edhe ish-luftëtari i UÇK-së, Dritan Goxhaj. Ai u ndalua pas fjalimit të mbajtur gjatë protestës. I pyetur nga gazetarët për arsyen e shoqërimit, Goxhaj, ndërsa ndodhej me pranga dhe i shoqëruar nga dy efektivë policie, deklaroi: “Për arsye se i thosha protestuesve ‘jo me policinë’. Këta janë provokatorët e Ramës.”
Deri në momentin e publikimit të këtij artikulli, Policia e Shtetit nuk ka bërë ende të ditur numrin zyrtar të personave të shoqëruar, arsyet konkrete të ndalimit të tyre apo nëse ndaj tyre do të nisin procedime penale. Po ashtu, nuk ka pasur një reagim zyrtar nga zyra e zëvendëskryeministres lidhur me incidentin.
Protesta e kësaj të marte është pjesë e mobilizimeve që po zhvillohen prej javësh në Tiranë, ku qytetarë dhe aktivistë kanë dalë në rrugë për të shprehur kundërshtimin ndaj politikave të qeverisë dhe për të kërkuar ndryshime politike. Në protestat e mëparshme janë regjistruar gjithashtu incidente mes protestuesve dhe policisë, me shoqërime dhe përplasje në zona të ndryshme të kryeqytetit.
Autoritetet pritet të japin një bilanc zyrtar mbi ngjarjet e kësaj proteste në orët në vijim.
Foto nga Google Images
Artikulli pregatitur nga ACTVUSA
