Xhudistja nga Kosova, Distria Krasniqi, ka shkëlqyer sërish në arenën ndërkombëtare duke u shpallur kampione e Evropës në Kampionati Evropian i Xhudos, që po mbahet në Tbilisi. Në këtë kompeticion marrin pjesë rreth 400 xhudistë nga 46 shtete, duke e bërë suksesin e saj edhe më të veçantë.
Në kategorinë deri në 52 kilogramë, Krasniqi e nisi rrugëtimin me paraqitje të fuqishme. Ajo kaloi me sukses raundet e para, duke treguar dominim dhe siguri në çdo duel. Në përballjen e saj të parë të rëndësishme, mposhti bindshëm çekën Tereza Bodnarova me “waza-ari”, duke dhënë sinjal të qartë për formën e saj të lartë.
Në çerekfinale, xhudistja pejane vazhdoi me ritëm të njëjtë, duke triumfuar ndaj polakes Aleksandra Kaleta dhe duke siguruar një vend në mesin e katër më të mirave. Sfida e gjysmëfinales solli përballë italianen Odette Giuffrida, një emër i njohur në botën e xhudos, por Krasniqi arriti të tregojë përvojën dhe qetësinë e saj për të kaluar edhe këtë pengesë.
Finalja ishte kulmi i garës, ku përballë saj ishte francezja Amandine Buchard. Në një duel të fortë dhe shumë teknik, Distria arriti të dalë fituese, duke siguruar medaljen e artë dhe duke ngritur flamurin e Kosovës në majë të podiumit.
Ky triumf shënon titullin e katërt evropian për Krasniqin, duke konfirmuar edhe njëherë statusin e saj si një prej sportisteve më të suksesshme që ka prodhuar Kosova. Ajo vazhdon të jetë një simbol krenarie dhe një dëshmi e fuqisë së xhudos kosovare në arenën ndërkombëtare.
Ndërkohë, përfaqësueset e tjera të Kosovës, Fatjona Kasapi dhe Erza Muminoviq, nuk arritën të avancojnë më tej, duke u eliminuar në fazat e hershme të garës.
Foto nga Google Images
Artikulli pregatitur nga ACTVUSA
