Publicisti Fatos Lubonja ka ngritur alarmin për ritmet e shpopullimit në Shqipëri, duke e cilësuar fenomenin si një nga sfidat më serioze me të cilat përballet vendi. Gjatë një interviste televizive, ai u shpreh se largimi i vazhdueshëm i qytetarëve, veçanërisht i të rinjve, po ndryshon strukturën demografike të vendit dhe po krijon pasoja që do të ndihen për shumë vite.
Sipas Lubonjës, në vend që të ndërmerren politika që nxisin shqiptarët të jetojnë dhe të punojnë në vend, qeveria po fokusohet te sigurimi i fuqisë punëtore nga jashtë. Ai argumentoi se një qasje e tillë nuk adreson problemin në themel, por përpiqet ta zëvendësojë atë.
Publicisti tha se janë diskutuar plane për të sjellë një numër të madh punonjësish të huaj në Shqipëri, duke e interpretuar këtë si një tregues se institucionet nuk po i japin prioritet frenimit të emigracionit të shqiptarëve. Sipas tij, largimi i popullsisë vendase nuk mund të kompensohet thjesht me importimin e fuqisë punëtore nga vende të tjera.
“Ka projekte për të sjellë nja 100 mijë emigrantë përnjëherë. E kanë treguar se nuk çajnë kokën për shqiptarët. Në këtë aspekt, këta thonë: le të ikin shqiptarët se sjellim indianë, bangladeshas, vietnamezë,” deklaroi Lubonja.
Lubonja paralajmëroi se, nëse trendi i emigrimit vazhdon me të njëjtat ritme dhe nuk ndërmerren masa për të krijuar kushte më të mira jetese dhe punësimi, Shqipëria rrezikon të përballet me një krizë të thellë demografike në vitet e ardhshme.
Deklaratat e tij vijnë në një kohë kur debati mbi emigracionin, mungesën e fuqisë punëtore dhe politikat e punësimit mbetet një nga temat më të diskutuara në vend.
Foto nga Google Images
Artikulli pregatitur nga ACTVUSA
