Marjana Koçeku largohet nga grupi parlamentar i PS-së, shpall veten deputete të pavarur
Modified date:
332
BallinaAktualitetMarjana Koçeku largohet nga grupi parlamentar i PS-së, shpall veten deputete të...
Një zhvillim i papritur ka tronditur skenën politike shqiptare, pasi deputetja e Shkodrës, Marjana Koçeku, e njohur gjerësisht si “Neomalësorja”, ka njoftuar largimin e saj nga grupi parlamentar i Partisë Socialiste.
Përmes një reagimi në rrjetet sociale, Koçeku bëri të ditur se do të vijojë mandatin e saj si deputete e pavarur, duke theksuar se vendimi lidhet me bindjet dhe parimet që e kanë shoqëruar përpara angazhimit të saj në politikën partiake.
Deputetja nuk ka dhënë detaje konkrete mbi arsyet që çuan në ndarjen me Partinë Socialiste, duke lënë hapësirë për interpretime mbi motivet e këtij vendimi. Megjithatë, në mesazhin e saj ajo nënvizon se idealet dhe vlerat personale mbeten udhërrëfyesi kryesor i veprimtarisë së saj politike.
Koçeku ishte një nga prurjet e reja të Partisë Socialiste në zgjedhjet parlamentare të vitit 2025. Ajo kryesonte listën e mbyllur të socialistëve në qarkun e Shkodrës, duke siguruar automatikisht një vend në Kuvend.
Largimi i saj nga grupi parlamentar vjen në një moment kur mazhoranca po përballet me sfida të ndryshme politike, ndërsa mbetet për t’u parë nëse deputetja do të mbajë të njëjtin qëndrim ndaj nismave të qeverisë apo do të ndërtojë një profil të ri politik si e pavarur.
Vendimi i Marjana Koçekut pritet të ngjallë debat në opinionin publik dhe në radhët e Partisë Socialiste, ndërsa vëmendja tashmë është përqendruar tek arsyet e plota që qëndrojnë pas këtij largimi të papritur.
“Prej sot jam deputete e pamvarun. Idealet e vlerat e mia janë ato që i kam pasë e i kam shprehë qysh para se me u asociu me nji parti. Ato m’i diftojnë kufijtë”, shkruan ajo.
