“Mandati si justifikim i përjetësisë politike” – analiza ironike e deklaratës së Ramës
Edi Rama duket se ka zbuluar një formulë të re politike: sa më shumë të kërkohet largimi i tij, aq më shumë bindet se duhet të qëndrojë. Sipas kësaj logjike, një protestë nuk është më një sinjal për reflektim, por një arsye shtesë për të vazhduar.
“Rama jepe doreheqjen..Ajo këngë më pëlqen dhe më jep aq shumë energji, sa më shkon mendja se mund të bëj edhe një këngë tjetër me të. Megjithatë, përtej këngës, largimi nga detyra që na është besuar nga shumica, vetëm sepse një pakicë bërtet në kor, nuk është as cilësi e një udhëheqësi, as përgjegjësi institucionale dhe as modesti intelektuale. Do të ishte thjesht braktisje e përgjegjësisë”, u shpreh ai.
Kryeministri thotë se largimi përballë thirrjeve të një pakice nuk është udhëheqje. Por pyetja që lind është: a matet përgjegjësia vetëm me numrin e votave të marra në zgjedhje, apo edhe me mënyrën se si qeveriset pas zgjedhjeve?
Në një demokraci, një mandat zgjedhor nuk është një kontratë pa afat dhe as një mburojë ndaj çdo kritike. Shumica i jep pushtetin një qeverie, por pakica ka të drejtën të kërkojë llogari, të protestojë dhe të ngrejë shqetësime. Pikërisht për këtë ekzistojnë institucionet demokratike.
Deklarata se misioni do të përfundojë vetëm kur Shqipëria të hyjë në Bashkimin Europian tingëllon si një mision historik personal. Por anëtarësimi në BE nuk është projekti i një individi; është një proces kombëtar që kërkon institucione të forta, reforma të qëndrueshme dhe besim të qytetarëve.
Ironia është se shumë liderë në histori e kanë justifikuar qëndrimin e gjatë në pushtet me argumentin se “ende nuk e kanë përfunduar punën”. Problemi është se qytetarët shpesh nuk gjykojnë vetëm për destinacionin që premtohet, por edhe për rrugën që ndiqet për të arritur atje.
Në fund, pyetja që mbetet është: a është një lider ai që qëndron gjithmonë sepse beson se është i domosdoshëm, apo ai që di edhe kur të hapë rrugën për një kapitull të ri? Rama e di se çfare ka bere me votat e shqiptareve, ai e di mirë qe nuk ka 800 mije vota!
Foto nga Google Images
Artikulli pregatitur nga ACTVUSA
