Presidenti i Shteteve të Bashkuara, Donald Trump, u bëri thirrje amerikanëve të rizbulojnë “frymën e pathyeshme” që ndërtoi vendin, ndërsa SHBA po i afrohet 250-vjetorit të shpalljes së pavarësisë, që do të shënohet në vitin 2026.
Në një mesazh të publikuar me rastin e festimeve që paraprijnë këtë përvjetor historik, Trump theksoi se ky është një moment për të reflektuar mbi vlerat që kanë formësuar kombin amerikan dhe për të forcuar unitetin kombëtar.
“Kjo është koha për të rizbuluar frymën e pathyeshme që ndërtoi vendin tonë dhe gjithçka që do të sigurojë që Amerika të mbetet gjithmonë kombi më i jashtëzakonshëm në faqen e Tokës,” deklaroi Presidenti Trump.
Sipas tij, historia e Shteteve të Bashkuara është ndërtuar mbi guximin, sakrificën dhe vendosmërinë e brezave të amerikanëve, të cilët kanë mbrojtur lirinë dhe kanë kontribuar në zhvillimin e vendit.
Presidenti Donald Trump i bëri këto komente gjatë ceremonisë së inaugurimit të Bibliotekës Presidenciale Theodore Roosevelt në shtetin e Dakotës së Veriut. Në fjalën e tij, Trump e lidhi figurën e ish-presidentit Theodore Roosevelt me vlerat që, sipas tij, kanë ndërtuar Shtetet e Bashkuara, si guximi, patriotizmi dhe vendosmëria. Duke iu referuar afrimit të 250-vjetorit të pavarësisë së SHBA-së, ai u bëri thirrje amerikanëve të rizbulojnë “frymën e pathyeshme” që ndërtoi kombin, duke theksuar se vetëm duke ruajtur këto ideale Amerika do të vazhdojë të mbetet “kombi më i jashtëzakonshëm në faqen e Tokës”.
Deklarata vjen ndërsa administrata Trump po përgatitet për një sërë aktivitetesh dhe ceremonish në kuadër të 250-vjetorit të pavarësisë së SHBA-së. Ky përvjetor pritet të shoqërohet me festime mbarëkombëtare që do të nderojnë historinë, trashëgiminë dhe arritjet e Shteteve të Bashkuara gjatë dy shekujve e gjysmë të ekzistencës së tyre.
Trump e mbylli mesazhin e tij duke theksuar se e ardhmja e Amerikës varet nga ruajtja e idealeve mbi të cilat u themelua vendi, duke u bërë thirrje qytetarëve të punojnë së bashku për të garantuar që SHBA të mbetet një simbol i lirisë, mundësive dhe lidershipit në botë.
Foto nga The White House page
Artikulli pregatitur nga ACTVUSA
