Sot, Presidentja e Republikës së Kosovës, Vjosa Osmani, bëri homazhe në kompleksin memorial “Adem Jashari” në Prekaz, duke nderuar sakrificën dhe heroizmin e familjes Jashari. Në këtë vizitë të veçantë, ajo u shoqërua nga Kryeministri Albin Kurti, Kryetari i Kuvendit Glauk Konjufca dhe disa ministra të qeverisë.
Në fjalën e saj, Presidentja Osmani theksoi rëndësinë e kujtimit të sakrificave të bëra për lirinë e Kosovës: “Nga ky vend, jo vetëm ne që kemi përjetuar luftën, por edhe brezat e rinj dhe fëmijët tanë, gjejnë frymëzim për të ardhmen dhe mbrojtjen e lirisë sonë të fituar me shumë mund. Por, mbi të gjitha, ne kujtojmë çmimin e lartë që u pagua për lirinë tonë. Nuk duhet kurrë të harrojmë dhe të devijojmë nga rruga e sakrificës së heronjve, dëshmorëve dhe ushtarëve të rënë”
Pas homazheve në kompleksin memorial, Presidentja Osmani vizitoi kullën e Jasharajve, ku u prit nga Baca Rifat Jashari. Ajo theksoi se familja Jashari mbetet një dritë udhërrëfyese për rrugën përpara: “Nga plumbi i parë e deri te qëndresa heroike e marsit 1998, komandanti legjendar Adem Jashari dhe familja Jashari nuk u thyen, nuk u zmbrapsën, por përqafuan pavdekësinë. Ata edhe sot mbeten dritë udhërrëfyese për rrugën tonë përpara”.
Në këtë vizitë, Presidentja Osmani nënvizoi se në momentet më të errëta, familja Jashari ndezi dritën e shpresës dhe gjeti forcën për të ecur përpara. “Në momentet kur liria dhe e ardhmja e Kosovës u vunë në pikëpyetje, ata u bënë përgjigjja, u bënë mburoja dhe zemra e këtij vendi. Lavdi familjes Jashari! Lavdi të gjithë heronjve të UÇK-së!”.
Kjo vizitë dhe homazhe janë një kujtesë e rëndësishme për të gjithë qytetarët e Kosovës dhe shqiptaret kudo qe ndodhen për të nderuar dhe respektuar sakrificën e heronjve që luftuan për lirinë dhe pavarësinë e vendit.
Foto nga Google Images
