Shtetet e Bashkuara të Amerikës kanë ndërmarrë një hap të fortë diplomatik në luftën globale kundër trafikut të fentanilit dhe drogave sintetike. Në një urdhër të ri të firmosur nga Sekretari i Shtetit, Marco Rubio, SHBA vendos kufizime vizash jo vetëm për trafikantët e përfshirë në rrjetet ndërkombëtare, por edhe për anëtarët e ngushtë të familjes së tyre.
Ky zhvillim është bërë publik edhe nga Ambasada Amerikane në Tiranë, e cila ndau sot deklaratën zyrtare të Sekretarit Rubio, duke theksuar vendosmërinë e qeverisë amerikane për të goditur rrënjët e këtij rrjeti global që po dëmton shoqëritë në të gjithë botën.
SHBA jane të përkushtuar të përdorim të gjitha mjetet e disponueshme për të ndalur këtë krizë globale. Këto masa synojnë të vendosin një denim real për përfshirjen në trafikimin e fentanilit, përmes ndalimit të aksesit në Shtetet e Bashkuara për ata që përfshihen në këtë aktivitet, si dhe për familjet që përfitojnë prej tij.
Fentanili është një nga drogat më të fuqishme dhe të rrezikshme që ka shkaktuar një epidemi vdekjesh në SHBA, duke marrë mijëra jetë çdo vit. Me këtë urdhër të ri, Departamenti i Shtetit synon të rëndojë pasojat personale dhe familjare për të gjithë ata që merren me trafikun e kësaj substance, si pjesë e përpjekjeve më të gjera për frenimin e prodhimit dhe shpërndarjes së saj në nivel ndërkombëtar.
Kufizimet e vizave janë vetëm një nga mjetet që SHBA po përdor, përkrah sanksioneve financiare, ndjekjes penale dhe bashkëpunimit me vendet partnere për goditjen e grupeve kriminale transnacionale.
Ky mesazh i fuqishëm, i shpërndarë nga Ambasada Amerikane në Tiranë, vjen si një kujtesë për të gjithë aktorët në rajon, se përfshirja në rrjetet e drogës nuk do të tolerohet dhe do të ketë pasoja reale – jo vetëm ligjore, por edhe personale e familjare.
Deklarata e Sekretarit të Shtetit amerikan, Marco Rubio:
“Kriza e fentanilit në Shtetet e Bashkuara është e paprecedent, me mbidozat që mbeten shkaku kryesor i vdekjes për amerikanët nga mosha 18 deri në 44 vjeç. Më shumë se 40 përqind e amerikanëve raportohen se njohin dikë që ka vdekur nga një mbidozë opioidesh, dhe në vitin 2024 Shtetet e Bashkuara patën mesatarisht mbi 220 vdekje nga mbidoza çdo ditë. Sot, po njoftoj një politikë të re kufizimi të vizave sipas seksionit 212(a)(3)(C) të Aktit të Imigracionit dhe Kombësisë, e cila do të zbatohet për anëtarët e familjes dhe bashkëpunëtorët e ngushtë personalë dhe biznesorë të individëve të sanksionuar sipas Urdhrit Ekzekutiv 14059 për vendosjen e sanksioneve ndaj personave të huaj të përfshirë në tregtinë globale të paligjshme të drogës (U.E. 14059).
Veprimi i sotëm zgjeron mjetet ekzistuese, duke përfshirë sanksionet sipas U.E. 14059 dhe pamundësitë për viza sipas seksionit 212(a)(2)(C) të Aktit të Imigracionit dhe Kombësisë për trafikantët e substancave të kontrolluara. Vendosja e kufizimeve të vizave për trafikantët e drogës, anëtarët e familjes së tyre dhe bashkëpunëtorët e ngushtë personalë dhe biznesorë, jo vetëm që do t’i pengojë ata të hyjnë në Shtetet e Bashkuara, por do të shërbejë edhe si një masë parandaluese kundër vazhdimit të aktiviteteve të paligjshme.
Departamenti Amerikan i Shtetit do të përdorë të gjitha mjetet e nevojshme për të penguar dhe çmontuar rrjedhën e fentanilit dhe drogave të tjera të paligjshme që hyjnë në Shtetet e Bashkuara dhe dëmtojnë qytetarët amerikanë.”
Foto nga Google Images
Artikulli i përgatitur nga ACTVUSA
