Kryetari i Lëvizjes Vetëvendosje, Albin Kurti, e cilësoi rezultatin e zgjedhjeve të 28 dhjetorit si më të thellin në historinë e Kosovës, duke theksuar se kjo fitore i përket popullit dhe Republikës. Në konferencën e parë për mediat pas shpalljes së rezultateve paraprake, Kurti deklaroi se vota e qytetarëve është një mesazh i qartë për të ecur përpara pa vonesa dhe për të vijuar me realizimin e projekteve qeverisëse. “Fitoi populli i Kosovës dhe Republika. Urime fitorja më e madhe në historinë e vendit. Sa më parë të certifikohet rezultati, aq më shpejt do të vazhdojmë me punët që na presin”, u shpreh ai.
Kurti shfrytëzoi rastin për t’i bërë thirrje edhe partive opozitare për bashkëpunim në Kuvend, veçanërisht në çështje që lidhen me marrëveshjet ndërkombëtare, miratimin e ligjeve të mira dhe mbrojtjen e interesit publik. Ai e cilësoi procesin zgjedhor si një ditë të gjatë, por të bukur dhe të rëndësishme për demokracinë në vend, duke shtuar se kjo fitore është në rrugë të mbarë për të tejkaluar edhe rezultatin e 14 shkurtit 2021.
Sipas rezultateve paraprake të publikuara nga Komisioni Qendror i Zgjedhjeve, Lëvizja Vetëvendosje ka siguruar 49,79% të votave në zgjedhjet e parakohshme të zhvilluara të dielën, duke u renditur forcë e parë politike në vend. Pas saj renditen Partia Demokratike e Kosovës me 21,19%, Lidhja Demokratike e Kosovës me 13,77% dhe Aleanca për Ardhmërinë e Kosovës me 5,74%, duke konfirmuar një fitore të thellë dhe një epërsi të qartë të Vetëvendosjes në skenën politike kosovare.
Foto nga Google Images
Artikulli i përgatitur nga ACTVUSA
