FIER – Procesi i shembjes së strukturave të ish-Azotikut në Fier ka ngritur shqetësim dhe pikëpyetje mes banorëve, të cilët kërkojnë më shumë informacion dhe transparencë për ndërhyrjet që po kryhen në zonë.
Kullat gjigante të kompleksit industrial, pjesë e panoramës së Fierit për dekada me radhë, po shemben. Ditën e sotme është shembur një nga kullat e ftohjes, e njohur edhe si një prej “oxhaqeve” të zonës së ish-Azotikut apo ish-TEC-it, ndërsa pamjet tregojnë momentin e shembjes së strukturës me përdorimin e tritolit.
Sipas raportimeve dhe denoncimeve të ngritura për këtë proces, qytetarët pretendojnë se shembjet janë kryer pa një komunikim të mjaftueshëm publik dhe pa transparencë të plotë për mënyrën se si po realizohen ndërhyrjet. Banorët kërkojnë përgjigje nga institucionet përgjegjëse, veçanërisht për masat e sigurisë dhe ndikimin që këto shembje mund të kenë në zonën përreth.
Ish-Azotiku ka qenë prej vitesh një zonë me problematika të trashëguara mjedisore. Në vitin 2019, dy prej kullave të ish-repartit të Urës në këtë kompleks ishin raportuar të dëmtuara pas tërmetit të 26 nëntorit, ndërsa ekspertët dhe drejtuesit e zonës kishin ngritur shqetësime për rrezikun që mund të paraqisnin strukturat e amortizuara.
Zona ka gjithashtu një histori të gjatë shqetësimesh për ndotjen. Raportime të mëparshme kanë dokumentuar praninë e ndotjes së trashëguar industriale dhe shqetësimet e banorëve që jetojnë pranë ish-kompleksit.
Shembja e kullave shënon zhdukjen e një pjese të historisë industriale të Fierit, por njëkohësisht ngre pyetje për të ardhmen e këtij territori: çfarë projektesh parashikohen për zonën, kush po i kryen punimet dhe çfarë masash janë marrë për garantimin e sigurisë së banorëve dhe mjedisit?
Qytetarët kërkojnë që institucionet përgjegjëse të japin një informacion të plotë dhe zyrtar për procesin, për kushtet në të cilat po realizohen shembjet dhe për projektet e ardhshme që mund të kenë lidhje me zonën e ish-Azotikut.
Ndërkohë, një pjesë e strukturave që dikur përfaqësonin një nga komplekset më të mëdha industriale të Fierit po zhduken gradualisht nga panorama e qytetit, duke lënë pas jo vetëm një hapësirë që po ndryshon, por edhe shumë pyetje që qytetarët presin t’u jepet përgjigje.
Foto nga Google Images
Artikulli pregatitur nga ACTVUSA
