Një moment simbolik shoqëroi mbrëmjen e sotme protestën e 20-të radhazi të qytetarëve dhe aktivistëve që kundërshtojnë projektin në Zvërnec dhe kërkojnë më shumë transparencë nga institucionet shtetërore.
Teksa protestuesit ishin mbledhur përpara godinës së Kryeministrisë, ndriçimi në zonë u ndërpre për disa minuta, duke lënë një pjesë të sheshit në errësirë. Megjithatë, tubimi nuk u ndërpre. Qindra pjesëmarrës reaguan menjëherë duke ndezur dritat e telefonave celularë, të cilat krijuan një panoramë të veçantë në zemër të kryeqytetit.
Pamjet e dritave që ndriçonin sheshin u shoqëruan me duartrokitje dhe thirrje të protestuesve, të cilët vijuan marshimin dhe qëndrimin e tyre përpara institucioneve qeveritare. Për shumë prej tyre, momenti mori një kuptim simbolik, duke përfaqësuar idenë se zëri qytetar vazhdon të dëgjohet edhe përballë vështirësive apo pengesave.
“Kur fiken dritat, qytetarët ndriçojnë rrugën”, ishte një nga mesazhet që u përhap mes pjesëmarrësve gjatë atyre minutave, duke u kthyer në një nga sloganet më të komentuar të mbrëmjes.
Protesta, e cila ka hyrë në ditën e saj të 20-të, vijon të mbledhë të rinj, aktivistë dhe qytetarë që kërkojnë mbrojtjen e zonave të mbrojtura në Zvërnec, transparencë në vendimmarrje dhe përgjegjësi nga institucionet publike. Në ditët e fundit, lëvizja ka marrë gjithashtu një dimension më të gjerë qytetar, me pjesëmarrës që shprehin pakënaqësi për çështje të ndryshme që lidhen me qeverisjen dhe administrimin e pasurive publike.
Nën praninë e forcave të policisë dhe masave të sigurisë, tubimi vazhdoi pa incidente, ndërsa organizatorët deklaruan se protestat do të vijojnë edhe në ditët në vijim.
Mbrëmja e sotme tregoi se, pavarësisht errësirës së përkohshme, mesazhi i protestuesve mbeti i dukshëm. Dritat e telefonave ndriçuan jo vetëm sheshin përpara Kryeministrisë, por edhe simbolikën që protestuesit kërkojnë të përcjellin prej javësh: se zëri qytetar nuk shuhet lehtësisht.
Foto nga Google Images
Artikulli pregatitur nga ACTVUSA
