Kryeministri Edi Rama prezantoi këtë të hënë reformën e re të quajtur “Shkalla e Meritës”, e cila, sipas qeverisë, synon të ndryshojë mënyrën e punësimit dhe të avancimit të punonjësve në administratën publike.
Gjatë prezantimit, Rama deklaroi se reforma synon të krijojë mundësi që personat më të kualifikuar, të përgatitur dhe të përkushtuar të hyjnë në administratë dhe të avancojnë në pozicione më të larta drejtuese, bazuar në meritë.
Sipas tij, një pjesë e reformës do të mbështetet edhe te përdorimi i inteligjencës artificiale (IA), me synimin për të përmirësuar funksionimin e administratës dhe shërbimet ndaj qytetarëve.
Një tjetër element i nismës është krijimi i Ministrisë së Administratës Publike, e cila do të ketë përgjegjësi për organizimin e institucioneve, menaxhimin e burimeve njerëzore dhe mbikëqyrjen e funksionimit të administratës.
Rama tha se synimi është që administrata të jetë më pranë qytetarëve dhe që kërkesat e tyre të trajtohen me më shumë përgjegjësi, duke shmangur vonesat dhe pengesat burokratike.
Megjithatë, zbatimi i reformës do të jetë vendimtar për të vlerësuar nëse parimi i meritës do të funksionojë realisht në institucionet shtetërore. Mbetet për t’u parë se si do të përcaktohen kriteret e punësimit dhe promovimit, si do të garantohet transparenca dhe në çfarë mënyre do të sigurohet që përzgjedhja të bëhet mbi bazën e aftësive profesionale dhe jo të lidhjeve politike.
”Kemi reflektuar mbi mënyrën se si të jemi më pranë njerëzve, duke e sjellë më pranë administratën, më pranë shtetin, duke sjellë më pranë tyre edhe ndjesinë se janë ata që janë arsyeja ekzistenciale, jetësore e shërbimeve të administratës.
Pjesë e këtyre ndryshimeve, ku kemi thirrur në ndihmë IA-në, por jo vetëm, është edhe Shkalla e Meritës. Tjetër reformë që në thelb ka të bëjë me një pyetje shumë të thjeshtë: Si ta bëjmë administratën një hapësirë ku njerëzit më të aftë, më të përgatitur, më të përkushtuar dhe më të dëshiruar që t’i shërbejnë vendit nga ana e shtetit, të mund jo vetëm të hyjnë, por edhe të ecin përpara, kur hyjnë, në shkallën e hierarkisë në administratë?
Pjesë e kësaj reforme është edhe krijimi i Ministrisë së Administratës Publike, që i përkushtohet administratës dhe mirëqeverisjes, përfshirë organizimin e institucioneve, trajtimin e kapitalit njerëzor dhe përgjegjësinë e secilit brenda administratës ndaj qytetarit që troket, kërkon t’i qahet halli dhe kërkon që halli i tij të mos humbasë në oqeanin e burokracisë”, tha Rama.
Foto nga Google Images
Artikulli përgatitur nga ACTVUSA
