Për të njëzetën ditë radhazi, të rinj, aktivistë mjedisorë dhe qytetarë nga zona të ndryshme të vendit u mblodhën në Tiranë për të vijuar protestën kundër projektit turistik në Zvërnec dhe Sazan, një lëvizje që prej javësh ka tërhequr vëmendjen e opinionit publik.
Tubimi nisi në sheshin “Skënderbej”, ku protestuesit u mblodhën me pankarta, flamuj dhe simbole që lidhen me mbrojtjen e mjedisit, përpara se të marshonin drejt godinës së Kryeministrisë. Ashtu si në ditët e mëparshme, pjesë e protestës u bënë edhe flamingot simbolike, tashmë të shndërruara në emblemë të lëvizjes qytetare për mbrojtjen e lagunës së Nartës dhe zonave të mbrojtura.
Protestuesit kundërshtojnë investimin e planifikuar në zonën e Zvërnecit, duke argumentuar se zhvillimi i projektit rrezikon një nga ekosistemet më të rëndësishme bregdetare të vendit. Ata kërkojnë transparencë të plotë mbi procedurat e ndjekura, mbrojtjen e pasurive natyrore dhe hetimin e çdo shkeljeje të mundshme ligjore që lidhet me projektin.
Ndërkohë, lëvizja ka marrë një dimension më të gjerë qytetar. Përveç kundërshtimit të projektit, gjatë marshimeve janë dëgjuar thirrje kundër korrupsionit, mungesës së përgjegjshmërisë politike dhe kulturës së pandëshkueshmërisë që, sipas protestuesve, ka shoqëruar jetën publike në Shqipëri për vite me radhë.
Në ditët e fundit, Policia e Shtetit ka proceduar penalisht dhjetëra pjesëmarrës për bllokim të akseve rrugore dhe shkelje të rregullave të tubimeve publike. Megjithatë, organizatorët kanë deklaruar se protestat do të vazhdojnë edhe në ditët në vijim, duke këmbëngulur se mbrojtja e Zvërnecit dhe e zonave të mbrojtura është një çështje që tejkalon përkatësitë politike dhe prek interesin publik.
Pas 20 ditësh mobilizim të pandërprerë, protesta për Zvërnecin po konsiderohet si një nga lëvizjet qytetare më të qëndrueshme të viteve të fundit, duke bashkuar të rinj, aktivistë, banorë lokalë dhe pjesëtarë të diasporës rreth kërkesës për mbrojtjen e mjedisit dhe rritjen e transparencës në vendimmarrjet që prekin pasuritë natyrore të Shqipërisë.
Foto nga Google Images
Artikulli pregatitur nga ACTVUSA
