Banorët e Divjakës kanë vijuar edhe këtë të shtunë protestën kundër planit për shkrirjen e Bashkisë Divjakë dhe bashkimin e saj me Bashkinë Lushnjë. Protesta ka hyrë në ditën e 16-të, duke treguar se kundërshtimi i banorëve ndaj reformës së propozuar territoriale nuk po zbehet.
Pas fjalimeve në foltore, qytetarët kanë marshuar në rrugët e qytetit, duke përsëritur thirrjet për ruajtjen e Bashkisë Divjakë dhe duke u bërë apel banorëve të tjerë që t’i bashkohen protestës.
“Divjaka Bashki!” ishte thirrja që jehonte në kor gjatë marshimit nëpër qytet.
Protestuesit shprehen të vendosur për ta vijuar rezistencën deri në tërheqjen e projektit që parashikon bashkimin e Divjakës me Lushnjën. Në protestat e ditëve të fundit, pjesë e tubimeve kanë qenë edhe banorë nga njësitë administrative të Bashkisë Divjakë.
Kundërshtimi është shoqëruar edhe me hapa institucionalë. Këshilli Bashkiak i Divjakës zhvilloi më 14 gusht një mbledhje të jashtëzakonshme për çështjen e reformës territoriale dhe, sipas raportimeve, u ngrit një grup pune për zhvillimin e dëgjesave me pesë njësitë administrative. Kryetari i bashkisë, Josif Gorrea, ka deklaruar gjithashtu se nuk ishte informuar më herët për shkrirjen e bashkisë.
Prej ditësh, qytetarët kërkojnë që Divjaka të mbetet bashki më vete, duke argumentuar se vendimmarrja për të ardhmen administrative të qytetit duhet të marrë në konsideratë vullnetin e banorëve.
Protesta pritet të vijojë edhe në ditët në vazhdim, ndërsa mesazhi i qytetarëve mbetet i pandryshuar:
“Divjaka Bashki!”
Foto nga Google Images
Artikulli pregatitur nga ACTVUSA
