Debati mbi projektin turistik të planifikuar në zonën e Sazanit dhe Zvërnecit ka sjellë një përplasje të re politike mes qeverisë dhe opozitës, këtë herë me në qendër edhe qëndrimin e Bashkimit Europian.
Partia Demokratike reagoi ndaj deklaratave të Komisioneres së Bashkimit Europian për Fqinjësinë dhe Zgjerimin, Marta Kos, e cila tha se autoritetet shqiptare i kanë garantuar Komisionit Europian se projekti do t’i nënshtrohet një vlerësimi të plotë mjedisor dhe se do të respektohen standardet europiane për mbrojtjen e natyrës.
Sipas opozitës, vlerësimi i Komisioneres nuk pasqyron gjendjen reale në Shqipëri dhe mbështetet në informacionet e ofruara nga qeveria. Demokratët argumentojnë se vendi po kalon një krizë të thellë politike dhe sociale, e cila, sipas tyre, nuk po merret në konsideratë nga institucionet europiane.
Në reagimin e saj, Partia Demokratike theksoi se mbështet kërkesat e protestuesve që prej javësh kundërshtojnë zhvillimin e projektit në zonat e mbrojtura të jugut të vendit. Opozita i konsideron këto kërkesa si elemente të domosdoshme për një zgjidhje paqësore të tensioneve politike dhe shoqërore.
Nga ana tjetër, Komisionerja Marta Kos nënvizoi se çdo investim duhet të jetë në përputhje me legjislacionin europian dhe me standardet e Kapitullit 27 të negociatave të anëtarësimit, i cili lidhet me mbrojtjen e mjedisit. Ajo theksoi se Komisioni Europian pret që procedurat e nevojshme të ndiqen sipas rregullave dhe standardeve të BE-së.
Deklaratat e Komisioneres u pritën pozitivisht nga kryeministri Edi Rama. Kreu i qeverisë deklaroi se institucionet europiane janë informuar në detaje për procedurat administrative që lidhen me projektet në Sazan dhe Zvërnec. Sipas tij, dokumentacioni përkatës është vënë në dispozicion të Komisionit Europian dhe procesi po zhvillohet në përputhje me kuadrin ligjor.
Përplasja e fundit tregon se çështja e investimit të lidhur me familjen Trump ka kaluar tashmë kufijtë e debatit të brendshëm politik, duke u kthyer në një temë ku ndërthuren interesat ekonomike, shqetësimet mjedisore dhe procesi i integrimit europian të Shqipërisë.
Ndërsa qeveria argumenton se projekti do të sjellë zhvillim ekonomik dhe investime strategjike, kundërshtarët e tij vazhdojnë të kërkojnë transparencë më të madhe dhe garanci të forta për mbrojtjen e ekosistemeve të ndjeshme në zonën e Vjosë-Nartës dhe bregdetit jugor.
Me protestat që vazhdojnë dhe me vëmendjen në rritje të institucioneve europiane, debati mbi të ardhmen e Sazanit dhe Zvërnecit pritet të mbetet një nga çështjet më të nxehta të verës politike në Shqipëri.
Ja nje pjesë nga deklarata e PD-se
“Lidhur me Deklaratën e Komisioneres për Fqinjësinë dhe Zgjerimin, zonjës Marta Kos, për krizën e rëndë që po kalon vendi ynë, Partia Demokratike shpreh shqetësimin dhe thekson se ajo është e bazuar në informacionet e rrejshme paraqitur nga miku i saj Edi, dhe jo në realitetin ekzistues në vend.
Ajo deklaratë injoron krizën e rëndë që ka mbërthyer Shqipërinë dhe i shërben Edi Ramës dhe jo zgjidhjes së krizës, përkundrazi e acaron dhe e thellon edhe më shumë. Partia Demokratike mbështet plotësisht 5 kërkesat e drejta të protestuesve si kushte për zgjidhjen paqësore të krizës.”
Foto nga Google Images
Artikulli pregatitur nga ACTVUSA
