Në një ngjarje me rëndësi të veçantë për diplomacinë shqiptare, është inauguruar sot selia e re e Ambasadës së Republikës së Shqipërisë pranë Selisë së Shenjtë në Vatikan. Ceremonia u zhvillua në prani të Ministrit për Evropën dhe Punët e Jashtme, Igli Hasani, përfaqësuesve të lartë të Vatikanit, trupit diplomatik të akredituar, si dhe figurave të shquara të komunitetit shqiptar dhe botës katolike.
Ministri Hasani, në fjalën e tij përshëndetëse, e cilësoi hapjen e kësaj ambasade si një hap të rëndësishëm në forcimin e marrëdhënieve të ngushta ndërmjet Shqipërisë dhe Selisë së Shenjtë. Ai theksoi se “kjo shtëpi e diplomacisë do të shërbejë si një urë për bashkëpunim, mirëkuptim dhe ndërtim të një bote më të paqtë dhe solidare, ku vlerat njerëzore dhe respekti reciprok të qëndrojnë në qendër të çdo veprimi diplomatik.”
“Dinjiteti njerëzor, respekti për diversitetin, liria fetare dhe drejtësia sociale janë disa prej vlerave të përbashkëta që lidhin Shqipërinë dhe Selinë e Shenjtë. Andaj, kjo shtëpi e re e diplomacisë do të jetë në shërbim të përpjekjeve dhe nismave të përbashkëta për të ndërtuar ura për një botë më të paqtë dhe më solidare”, është shprehur z. Hasani.
Ambasada e re, e vendosur në një nga zonat më simbolike pranë Vatikanit, përfaqëson jo vetëm një avancim logjistik dhe institucional, por edhe një simbol të vendosmërisë së Shqipërisë për të forcuar dialogun ndërfetar, për të ruajtur vlerat e bashkëjetesës dhe për të promovuar kontributin e shqiptarëve në historinë dhe kulturën e krishterimit.
Hapja e selisë së re vjen në një kohë kur marrëdhëniet midis Shqipërisë dhe Vatikanit janë në një moment të qëndrueshëm dhe të begatë. Selia e Shenjtë ka vlerësuar vazhdimisht modelin shqiptar të harmonisë fetare, duke e cilësuar atë si shembull unik në rajon dhe më gjerë. Kujtojmë se Shqipëria ka qenë një nga vendet e para në Ballkan që vendosi marrëdhënie diplomatike me Selinë e Shenjtë pas rënies së regjimit komunist, ndërsa vizita historike e Papa Françeskut në Tiranë në vitin 2014 mbetet një nga momentet kulmore të kësaj miqësie të thellë.
Në fund të ceremonisë, u theksua rëndësia që ambasada të shërbejë jo vetëm si qendër përfaqësimi zyrtar, por edhe si hapësirë kulturore, bashkimi dhe dialogu për shqiptarët që jetojnë në Itali dhe më gjerë. Kjo seli e re është një dëshmi e përkushtimit të Shqipërisë ndaj një diplomacie aktive, humane dhe me ndikim pozitiv në skenën ndërkombëtare.
Foto nga Google Images
Artikulli i përgatitur nga ACTVUSA
