Një zjarr i përmasave të konsiderueshme ka përfshirë pasditen e sotme tregun ambulant në zonën e plazhit ne Durres, duke shkaktuar panik mes tregtarëve dhe pushuesve, si dhe dëme të mëdha materiale. Flakët janë përhapur me shpejtësi mes stendave dhe dyqaneve të improvizuara, ndërsa tymi i dendur është parë nga larg, duke alarmuar gjithë zonën përreth.
Sipas informacioneve paraprake, nuk raportohet për të lënduar në njerëz, por një numër tregtarësh kanë pësuar humbje të mëdha të mallrave. Sipas dëshmive të marra në vendngjarje, zjarri ka përfshirë kryesisht dyqane të shitjes së rrobave verore, veshjeve për fëmijë, lodrave plastike, këpucëve, çadrave plazhi dhe artikujve të tjerë sezonalë. Disa pronarë pohojnë se kanë humbur mallra me vlerë nga 4,000 deri në 10,000 euro, pasi zjarri u përhap shumë shpejt dhe nuk kishin mundësi të ndërhynin.
“Pashë tymin dhe vrapova menjëherë, por kur arrita aty, gjithçka ishte në flakë. Nuk shpëtova asgjë – të gjitha rrobat, lodrat e fëmijëve, të gjitha u dogjën,” – rrëfen një prej tregtarëve, ende i tronditur.
Makinat zjarrfikëse kanë mbërritur me shpejtësi në vendngjarje dhe kanë ndërhyrë për izolimin e flakëve, duke shmangur përhapjen e mëtejshme të zjarrit në zonat e afërta. Aktualisht, autoritetet janë duke hetuar shkaqet e zjarrit, të cilat mbeten ende të paqarta. Dyshimet paraprake lidhen me një defekt elektrik apo pakujdesi gjatë përdorimit të pajisjeve elektrike në një nga stendat e tregut.
Zyrtarë të njësisë administrative thanë se do të bëhet një vlerësim i plotë i dëmeve, ndërsa tregtarët kërkojnë ndihmë për të rifilluar aktivitetin, sidomos në këtë sezon turistik, kur shitjet janë jetike për ta.
Autoritetet u bëjnë thirrje tregtarëve të tregojnë kujdes të shtuar dhe të zbatojnë të gjitha masat e sigurisë kundër zjarrit, veçanërisht në tregjet e hapura dhe zonat me qarkullim të lartë gjatë verës.
Foto nga Google Images
Artikulli i përgatitur nga ACTVUSA
