Ndërsa zjarret vijojnë të kërcënojnë zona të ndryshme të Shqipërisë, deklarata e Partisë Demokratike për menaxhimin e situatës ngre një nga pyetjet më të rëndësishme të këtyre ditëve: a është Shqipëria e përgatitur për t’u përballur me emergjencat që përsëriten çdo verë?
Kritika e PD-së, e artikuluar nga deputeti Klevis Balliu, shkon përtej një situate konkrete zjarresh. Ajo vendos në qendër përgjegjësinë e qeverisë për të garantuar mbrojtjen e jetës së qytetarëve, pronës dhe territorit, si dhe kapacitetet që shteti duhet të ketë përpara se një emergjencë të kthehet në katastrofë.
Balliu kërkoi përgjegjësi nga ministri i Brendshëm, Besfort Lamallari, duke ngritur pikëpyetje mbi kapacitetet e strukturave shtetërore për përballimin e zjarreve dhe emergjencave të tjera. Sipas tij, nuk mjaftojnë deklaratat publike dhe reagimet pasi flakët janë përhapur; nevojiten investime të qëndrueshme në mjete, pajisje dhe personel të specializuar.
Zjarrfikësi nuk mund të jetë heroi që shteti kujton vetëm kur kamera është ndezur. Ai është profesionisti që dërgohet në vijën e parë të rrezikut dhe duhet të ketë pajisjet më të mira të mundshme për të mbrojtur jetën e tij dhe të qytetarëve.
Nga automjetet moderne dhe pajisjet personale mbrojtëse, deri te sistemet e zbulimit të hershëm, avionët dhe helikopterët për ndërhyrje ajrore, infrastruktura e emergjencave duhet të jetë një investim afatgjatë dhe jo një reagim i momentit.
PD e ka shoqëruar kritikën me një premtim politik: një “Paketë të Plotë për Emergjencat” dhe një “Program Antizjarr”, të hartuar me ekspertë vendas dhe të huaj, si pjesë e planit të saj qeverisës. Synimi i deklaruar është rritja e buxhetit dhe krijimi i kapaciteteve më të qëndrueshme për përballimin e fatkeqësive natyrore.
Megjithatë, kur një qeveri është në pushtet prej vitesh, përgjegjësia për gjendjen e strukturave shtetërore është e saj. Nuk mjafton të thuhet se zjarret janë të mëdha, temperaturat janë të larta apo kushtet atmosferike janë të vështira. Pikërisht sepse këto rrethana përsëriten, shteti duhet të jetë i përgatitur.
Një vend që përballet çdo vit me zjarre duhet të ketë strategji shumëvjeçare, fonde të dedikuara, pajisje moderne, trajnime të vazhdueshme dhe koordinim të plotë mes institucioneve.
Dhe mbi të gjitha, duhet të ketë transparencë.
Nëse ka mjete të mjaftueshme, publiku duhet ta dijë sa janë dhe ku ndodhen. Nëse mungojnë, duhet të dihet pse. Nëse pajisjet janë të amortizuara, duhet të dihet kush mban përgjegjësi. Dhe nëse buxheti nuk është i mjaftueshëm, kjo duhet të jetë pjesë e një debati të hapur parlamentar dhe publik.
Prandaj, propozimi për një Program Antizjarr dhe një Paketë të Plotë për Emergjencat duhet të merret seriozisht dhe të shoqërohet me objektiva konkretë: sa mjete do të blihen, sa zjarrfikës do të trajnohen, çfarë pajisjesh do të sigurohen, si do të përmirësohet ndërhyrja ajrore dhe si do të forcohet parandalimi.
Sot Shqipëria ka nevojë pikërisht për këtë: më pak propagandë, më shumë përgatitje; më pak reagim pas katastrofës, më shumë parandalim; dhe mbi të gjitha, një sistem emergjencash që vendos jetën e qytetarëve dhe sigurinë e zjarrfikësve në krye të çdo prioriteti.
Deklarata e plote:
Shqipëria po digjet, nga cepi në cep, ndërsa Edi Rama shëllehet në Dhërmi, ku ka marrë Alex Sorosin që ta ndihmojë të shuajë flakët që protesta qytetare i ka vënë qeverisë së tij.
Paaftësia për të mbrojtur qytetarët, pasuritë e tyre dhe territorin e vendit është shenja kryesore e kësaj qeverisjeje, dhe zjarret vetëm e kanë nxjerrë në pah këtë fakt në mënyrë dramatike.
Në rrezik nuk janë vetëm shtëpitë, pyjet, kullotat dhe lagjet e qyteteve, por edhe jeta e qytetarëve dhe e zjarrfikësve, të cilët përballen me flakët pa pajisjet e nevojshme.
Por kjo nuk duhet parë thjesht si paaftësi. Ky është një dështim kriminal në prioritetet e një qeverie që ka para për gjithçka, përveç sigurisë së shqiptarëve.
Edi Rama ka gjetur miliona euro për koncerte, spektakle, kopshte dhe instalacione idiotëske, ndërkohë që zjarret i lufton me lopata dhe me zjarrfikëse të viteve ’70, që rrjedhin ujë pa arritur te zjarri. Rreth 4 milionë eurot për Kanye Ëest do të ishin shumë sot një investim jetik për zjarrfikësit, për pajisje moderne dhe për krijimin e kapaciteteve reale kundër zjarreve.
Por ka edhe një ironi që tregon më mirë se çdo fjalë se ku i ka prioritetet kjo qeveri.
Edi Rama dhe Besfort Lamallari gjejnë makina me ujë kur duhet të përballen me protestuesit, por nuk gjejnë makina me ujë kur Shqipëria përfshihet nga flakët.
Kur sheh se si zbret në sheshe policia për të sulmuar qytetarët që protestojnë, e armatosur deri në dhëmbë, me makina të blinduara, ujëhedhëse dhe gazhedhëse, dhe kur sheh se si përballohen zjarret, e kupton se kjo qeveri e meriton epitetin diktaturë.
Ky është shteti i Edi Ramës: i pamëshirshëm me qytetarët, të cilët i lë në mëshirën e fatit kur bien zjarre apo ndodhin fatkeqësi të tjera. I gatshëm të përdorë çdo mjet për të shtypur protestën, por neglizhent për të siguruar mjetet bazë për të mbrojtur njerëzit dhe pronat.
Përgjegjësia nuk mund të fshihet pas deklaratave të ministrive apo propagandës televizive. Besfort Lamallari, si Ministër i Brendshëm, duhet të përgjigjet se si strukturat që varen prej tij nuk kanë kapacitetet e nevojshme për një situatë që përsëritet çdo vit.
Zjarrfikësit nuk mund të dërgohen në frontin e zjarrit sikur po shkojnë për të mbjellë pemë. Çdo zjarrfikës që futet në flakë pa pajisjet e duhura është dëshmi e dështimit të shtetit.
Qeveria e Edi Ramës nuk mund të kujtohet për zjarrfikësit vetëm kur kamerat janë ndezur. Nuk mjaftojnë fotot, deklaratat dhe propaganda. Duhen mjete, pajisje mbrojtëse, automjete, avionë, helikopterë, infrastrukturë dhe një sistem real sigurimi dhe reagimi ndaj emergjencave.
Edi Rama dhe Besfort Lamallari duhet të japin llogari për këtë dështim. Sepse kur një qeveri ka para për luksin dhe propagandën, por jo për të mbrojtur jetën e qytetarëve dhe të zjarrfikësve, problemi nuk është mungesa e parave. Problemi është se ku zgjedh t’i çojë paratë kjo qeveri.
Partia Demokratike angazhohet fuqimisht se, me ardhjen në qeveri, do të ketë si pjesë të planit qeverisës një Paketë të Plotë për Emergjencat, me një Program Antizjarr, të hartuar nga ekspertë vendas dhe të huaj, si dhe një buxhet të rritur dhe të përshtatshëm.
Ne do t’i japim fund asaj që në letër paraqitet si ‘Rilindje 2.0’, por në realitet është një fasadë prej varaku që bie sapo Shqipëria përballet me zjarr, përmbytje apo çdo krizë tjetër civile.”
Foto nga Google Images
Artikulli pregatitur nga ACTVUSA
