Sot shënohen 10 vite nga ndarja nga jeta e Met Begës, një prej figurave më të dashura të humorit shqiptar. I lindur më 7 gusht 1946 në Tiranë, ai u bë një emër i njohur në Estradën e Tiranës, duke sjellë në skenë dhe ekran një humor të pastër, plot origjinalitet dhe pa banalitet.
Met Bega ishte një artist që e zotëronte mjeshtërisht batutën dhe interpretimin, duke krijuar personazhe që mbeten të paharrueshme për publikun shqiptar. Ai shkëlqeu në filma si “Dy herë mat” (1986), “Tela për violinë” (1987), “Stolat në park” (1988) dhe “Edhe ashtu edhe kështu” (1989). Skeçet e tij, veçanërisht ato me Mariana Kondin dhe Rita Latin, janë ende të freskëta në kujtesën e publikut, me batuta që vazhdojnë të përdoren edhe sot.
Pavarësisht kontributit të tij të madh në artin shqiptar, pas ndarjes nga jeta më 21 prill 2015, ai nuk mori vlerësimin që meritonte. Nuk iu dha asnjë çmim pas vdekjes, dhe figura e tij u la në harresë, ndonëse publiku vazhdon ta kujtojë me dashuri dhe respekt.
Met Bega mbetet një ikonë e humorit shqiptar, një artist që solli buzëqeshje dhe gëzim në çdo skenë ku u ngjit. Trashëgimia e tij artistike do të jetojë përjetësisht në zemrat e atyre që e duan artin e vërtetë.
Foto nga Google Images
